काठमाडौं (हाम्रो खेलकुद)– नेपालको खेलकुद र शिक्षामा विकासका लागि विश्व तेक्वान्दो महासंघ (डब्लुटिएफ) र अम होङ गिल फाउन्डेसनबीच सम्झौता भएको छ । दक्षिण कोरियास्थित सिओलस्थित डब्लुटिएफको मुख्यालयमा आयोजित कार्यक्रममा डब्लुटिएफका अध्यक्ष जो चङ वन र फाउन्डेसनका प्रमुख ली जे हुबीच सम्झौतापत्रमा हस्ताक्षर भएको नेपाल तेक्वान्दो संघका सदस्य दीपक विष्टले जानकारी दिए ।

सो अवसरमा दक्षिण कोरियाका लागि नेपाली राजुदूत अर्जुनजंग बहादुर सिंहलगायतको उपस्थिती रहेको थियो । सम्झौता अनुरुप नेपाल तेक्वान्दो संघको व्यवस्थापन र सहकार्यमा अम होङ गिल फाउन्डेसनले नेपालमा विद्यालय निर्माणका साथै भत्किए विद्यालयलाई पुर्ननिर्माण गर्नेछ ।

फाउन्डेसनले आफूले निर्माण र पुर्ननिर्माण गरेको विद्यालयमा तेक्वान्दो संघसँगको सहकार्यमा तेक्वान्दो प्रशिक्षकसहितको तेक्वान्दो खेल सञ्चालनको कार्यक्रम अगाडि बढाउनेछ । फाउन्डेसनको स्थापना विश्व प्रसिद्ध पर्वतारोही अम होङ गिलको नाममा सन् २००८ मा भएको थियो ।

अम होङ गीलले विश्वका ८ हजार मिटरभन्दा माथिको १६ हिमालको आरोहण गरेर विश्व रेकर्ड कायम गरेका थिए । सोही फाउन्डेसनले नेपालका विकेट स्थानमा १२ विद्यालय निर्माण गरिसकेको अब २ विद्यालय निर्माण गर्ने बताइएको छ ।

डब्लुटिएफले यसअघि पनि नेपालको अनाथ बालबालिकाका लागि केयर्स नेपाल भन्ने कार्यक्रममा माफर्त तेक्वान्दो खेल सुरु गरेको छ । जुन नेपालका ८ असाहय बालबालिका संरक्षित संस्थामा तेक्वान्दो खेल सुरु गरिसकेको छ । ती बालबालिकालाई निशुल्क प्रशिक्षण र खेल सामाग्री समेत प्रदान गरिसकेको जनाइएको छ ।