लस भेगास (एजेन्सी) – ‘द मनी फाइट’ कहलिएको बक्सिङ खेलमा अमेरिकाका फ्लोइड मेवेदरले आयरल्यान्डका कनर मेग्रेररलाई १० औँ राउन्डमा हराएका छन् । यस जितसँगै मेवेदरले आफ्नो अपराजित यात्रालाई ५० खेलसम्म लम्ब्याएका छन् ।

जितपछि अमेरिकी मुक्केबाज फ्लोइड मेवेदर ।

लास भेगसमा खेलिएको खेलको पहिला ३ राउन्डमा मेग्रेरर मेवेदरमाथि हावी देखिएका थिए । तर मेवेदरले चौथो राउन्डपछि लय समात्दै १० औँ राउन्डमै थाकेका मेग्रेररलाई टेक्निकल नक-आउटमार्फत हराएका थिए । युएफसी च्याम्पियन रहेका मेग्रेरले बक्सिङ रिङ्गमा भने आफ्नो पहिलो खेल खेल्दै थिए ।

दसौँ राउन्ड अघिसम्म मेग्रेररले मेवेदरलाई राम्रो प्रतिस्पर्धा दिईरहेका थिए । तर दसौँ राउन्डमा मेवेदरका लगातार मुक्का खाएपछी मेग्रेरर चोटग्रस्त भएका थिए । त्यसपछी रिफ्रीले खेल रोक्दै मेवेदरलाई विजयी घोषित गरे ।

जितपछि बोल्दै मेवेदरले आफ्नो खुसी व्यक्त गरे । ‘दर्शक जे हेर्न आएका थिए मैले उनीहरुलाई त्यहि दिए । पक्याओको फाइट पछी मैले उनीहरुका लागि यति त गर्नै पर्ने थियो । त्यसैले आज मैले उनीहरुका लागि हेर्न लायक प्रस्तुति दिए ।’

खेल रोकिनु अघि मेवेदरले सबै निर्णयकका स्कोर-कार्डमा अग्रता (८७-८३, ८९-८२, ८९-८१) लिईरहेका थिए । मेवेदरले खेलअघि यो खेल आफ्नो अन्तिम हुने पनि बताएका थिए ।