पोखरा (हाम्रो खेलकुद)– खेल्नुअघि नै चार पटकको च्याम्पियन काठमाडौंको शिवम् न्यू डायमण्ड एकेडेमी र विभागीय नेपाल पुलिस क्लब पोखराको लामाचौरमा मंगलबार सुरु भएको रेडबुल राष्ट्रिय महिला भलिबल प्रतियोगिताको सेमिफाइनलमा पुगिसकेका थिए ।

समूहमा यी दुई टोली रहेकाले उद्घाटन खेल मात्र समूह ‘ए’ को विजेताको छिनोफानोका लागि मात्र थियो । जसमा न्यू डायमण्डले पुलिसमाथि ३–० को सहज जित निकाल्यो । पहिलो सेट २५–१५ ले आफ्नो पक्षमा पारेको डायमण्डले त्यसपछिको दुई सेट लगातार २५–१९ र २५–१७ ले जित्यो ।

विजयी टोलीकी मुख्य स्पाइकर प्रतिभा मालीले उत्कृष्ट खेल प्रदर्शन गरेकी थिइन् । प्रशिक्षक कुमार राईले टोलीको प्रदर्शन सन्तोषजनक नरहेको बताए । ‘पहिलो खेल सधै गाह्रो हुने गर्दछ । आज पुलिसविरुद्धको खेलमा दोस्रो र तेस्रो सेटमा त्यस्तै देखियो,’ प्रशिक्षक राईले भने, ‘दोस्रो सेटमा तालमेल बिग्रदा तेस्रो सेटमा दुई खेलाडी परिवर्तन गरे । त्यसमा पनि सोचेजस्तो हुन सकेन । आशा छ बुधबारको सेमिफाइनलमा त्यस्तो नहोला ।’

प्रशिक्षक राईले उपाधि रक्षा टोलीको लक्ष्य रहेको सुनाए । ‘भोलि घरेलु टोली पश्चिमाञ्चलसँग खेल हुदैछ ’ उनले थपे, ‘दर्शक बाडिएपनि हामी पुलिसलाई भन्दा पश्चिमाञ्चललाई सहजै पराजित गर्नमा सक्षम छौ ।’

पुलिसका प्रशिक्षक रुपेश खड्काले नयाँ र पुराना खेलाडीहरुको तालमेल मिल्न नसक्दा खेल सोचेजस्तो नभएको बताए । ‘हाम्रो टिम सेट हुन बाँकी नै छ । सेमिफाइनलमा एपिएफ वा पश्चिमाञ्चल जो आएपनि खेल्न तयार छौं,’ खड्काले भने,‘खेलाडीहरुले नामै काफी भने जस्तै डायमण्डसँग जित्नैपर्ने प्रेसरमा खेल्दा झनै खेल बिग्रियो ।’