काठमाडौं (हाम्रो खेलाडी )– नेपाल एपिएफ क्लबलाई शुक्रबार केएनपी राष्ट्रिय महिला भलिबलको उपाधि रक्षा गराउन महत्वपूर्ण भूमिका निर्वाह गरेकी सरस्वती चौधरी सर्वोत्कृष्ट खेलाडी चुनिएकी छिन् ।

त्यस्तै फाइनलमा पराजित न्यू डायमन्ड एकेडेमीकी प्रतिभा मालीले दोहोरो उपाधि जितिन् । उत्कृष्ट स्पाइकर बनेकी प्रतिभा आयोजक शेरबहादुर खड्का स्मृति स्पेशव अवार्डबाट पनि सम्मानित भइन् । सरस्वतीले जेम फ्लोरिङले प्रायोजन गरेको १५ हजार रुपैयाँका साथै एयर एसियाबाट प्रायोजन भएको काठमाडौ–मलेसिया–काठमाडौँको एयर टिकट प्राप्त गरिन् ।

प्रतिभाले जेम फ्लोरिङ नै प्रायोजन गरेको १० हजार रुपैयाँका साथै प्यारागन ट्राभल्स एण्ड टुर्सका कार्यकारी निर्देशक प्रकाश सिंह कार्कीद्धारा प्रायोजन भएको माउण्टेन फ्लाईटको टिकट प्राप्त गरिन । जेनेरेसन नेक्स प्रा.लीका अध्यक्ष पवन कुमार भिमसरियाले प्रतियोगिताले सरस्वती र प्रतिभालाई एप्पल मोबाइल प्रदान गरे ।

प्रतियोगितामा एपिएफकी उषा विष्ट उत्कृष्ट क्वीकर, न्यू डायमन्डकी कृपा अधिकारी उत्कृष्ट सेटर, पश्चिमाञ्चकी पुनम चन्द उत्कृष्ट ब्लकर, न्युडायमण्डकी सलिना श्रेष्ठ उत्कृष्ट डिफेन्स , एपिएफकी नेविका चौधरी उत्कृष्ट सर्भर र एपिएफका ज्ञानेन्द्र विष्ट ज्ञानेन्द्र विष्ट उत्कृष्ट प्रशिक्षक चुनिए । जेम फ्लोरिङ उत्कृष्टलाई समान ३ हजार रुपैयाँ प्रदान गरेको थियो । जेठ २३ देखि सञ्चालित प्रतियोगितामा ६ टोलीको सहभागिता थियो ।