काठमाडौँ (हाम्रो खेलकुद) – सुर्य नेपाल गल्फ टुर २०१६/१७ अन्तर्गतको अन्तिम इभेन्ट, सुर्य नेपाल गल्फ च्याम्पियनसिप सोमबारदेखि गोकर्ण गल्फ क्लबमा सुरु हुँदैछ।

७२ होलमा खेलिने इभेन्ट सोमबार देखि बिहिबारसम्म चल्नेछ। दुई चरणको खेलपछि शीर्ष २४ व्यावसायिक र शीर्ष ६ एमेच्योर गल्फरहरु मात्र अर्को चरणमा प्रवेश गर्नेछन्। शुक्रबार आयोजना हुने प्रो-एम इभेन्टमा भने २५ व्यावसायिक र ७५ एमेच्योर क्लब गल्फरहरुले प्रतिस्पर्धात्मक एवं मनोरन्जनात्मक इभेन्टमा सहभागिता जनाउनेछन्।

कुल ३६ जना गल्फरहरु सहभागी हुने प्रतियोगिताको नगद पुरस्कार १२ लाख रुपैयाँ रहेको छ। प्रतियोगिताको विजेताले २ लाख २० हजार रुपैयाँ पाउनेछन् भने उपविजेता र तेश्रो स्थानका खेलाडीले क्रमश १ लाख ३४ हजार र ९० हजार रुपैयाँ हात पार्नेछन्। चौथो स्थानका खेलाडीले ७४ हजार जित्दा पाँचौ स्थानको खेलाडीले ६५ हजार रुपैयाँ आफ्नो पोल्टामा पार्नेछन्। शीर्ष २४मा अटाउने खेलाडीहरुले नगद पुरस्कार पाउने व्यवस्था गरिएको छ।

नेपालक शीर्ष वरियताका गल्फर शिवराम श्रेष्ठ सँगै भुवन नगरकोटी, संजय लाम र रबि खड्का प्रतियोगिताका दावेदारका रुपमा रहेका छन्। यसैगरी एमेच्योर तर्फको उपाधिका लागि भने शुक्र बहादुर राई, टंक बहादुर कार्की, तेन्जिङ छिरिङ, शिव कुमार माझि र टाशी घलेको प्रतिस्पर्धा हुनेछ। प्रतियोगिताका सहभागी खेलाडीहरुले आइतबार प्रशिक्षण गरेका थिए। कोर्स एकदम राम्रो स्थितिमा रहेकाले खेलमा कम स्कोर आउने अपेक्षा गरिएको छ।

नेपाल व्यवसायिक गल्फर्स संघका अध्यक्ष रबिन्द्र मान श्रेष्ठले प्रतियोगिता आयोजनामा सहयोग गरेकोमा सुर्य नेपाल प्रा.लि.लाइ विशेष धन्यवाद दिएका छन्।