काठमाडौं (हाम्रो खेलकुद) – चोखानी इन्टरप्राइजेको मुख्य प्रायोजन र टुह्म्प कम्यूनिकेशन र गोकर्ण गल्फ क्लबको आयोजनामा भएको नेसक्याफे गोल्ड ओपन गल्फ प्रतियोगिताको दोस्रो संस्करणको उपाधि ध्रुव थापाले जितेका छन्।

८ ह्यान्डीक्याप बोकेर खेलेका ध्रुवले कुल ४० स्टेबलफर्ड अंक जोड्दै उपाधि जितेका हुन्। दुई खेलाडी ३९ अंकमा रहेको अवस्थामा सोनाम घलेले काउन्ट ब्याकमा प्रकाश गुरुङलाई पछि पार्दै दोश्रो स्थान हासिल गरे। सोनामले ब्याक नाइनमा २० अंक जोडेका थिए भने प्रकाशले १९ अंक ल्याएका थिए।

२५ ग्रस पोइन्ट जोडेका टासी छिरिङले बेस्ट ग्रस पोइन्ट्ससँगै सबैभन्दा धेरै बर्डी प्रहार गर्ने उपाधि पनि हात पारे। उनले प्रतियोगिताकै उच्च ५ बर्डी प्रहार गरेका थिए।

महिलातर्फको उपाधि रेखा घिमिरेले जितिन भने प्रतिमा शेर्पा दोश्रो भइन। रेखाले ३३ अंक जोड्दा दोश्रो भएकी प्रतिमाले २७ अंक ल्याइन। सिनियरतर्फको उपाधि दमन बहादुर घलेको नाममा रह्यो। उनले समान ३१ अंक बनाएका टि.जी. श्रेष्ठलाई काउन्ट ब्याकमा पराजित गरे।

जुनियरको उपाधि ३४ अंक जोडेका तनुष संघाईले जिते भने दोश्रो स्थानमा १ अंक कम लयका देवंश अग्रवाल रहे। लंगेष्ट ड्राइभको उपाधि विजय श्रेष्ठ एंहसले हात पर्दा क्लोजेस्ट टु द पिन अवार्ड गोकर्ण गल्फ क्लबका अध्यक्ष सुह्रिद घिमिरेको नाममा रह्यो।

९९ खेलाडीको सहभागिता रहेको प्रतियोगिता स्टेबल फर्म्याटमा ३/४ ह्याण्डीक्यापमा खेलिएको थियो। नेस्क्याफे गोल्डका व्यावसयिक म्यानेजर वारिंद्र सेवक, दक्षिण कोरियाली राजदुत पार्क यो सिक, गोकर्ण गल्फ क्लबका अध्यक्ष सुह्रिद घिमिरे, कप्तान जोसेफ नाथन र चोखानी इन्टरप्राइजेजका संजय चोखानी लगायतले पुरस्कार वितरण गरेका थिए।