एसियाली पदक विजेता मनिताले विवाह गरिन्

काठमाडौं (हाम्रो खेलकुद)– एसियाली पदक विजेता तेक्वान्दोकी मनिता शाही विवाह बन्धमा बाधिएकी छिन् । मनिताको शनिबार बिनेस खड्गीसँग विवाह भएको थियो । झन्डै दुई बर्ष अमेरिका बसाईपछि मनिता केही साता अघि स्वदेश फर्केकी थिइन् ।

अमेरिका जानुअघि मनिताले दक्षिण एसियाली खेलकुद (साग) की स्वर्ण र रजत जितेकी थिइन् । सविता राजभण्डारी, संगीना वैद्य जस्ता सफल खेलाडीको पुस्तापछि मनिता र आयशा शाक्य तेक्वान्दोका सफल महिला खेलाडी हुन् ।

मनिता र आयशा दुवैले सन् २००६ को बुसान एसियाडमा अर्का चर्चित खेलाडी दीपक विष्टसँगै कांस्य पदक जितेका थिए। त्यही वर्ष सागमा स्वर्ण जितेकी मनिताले साग (सन् २०११) मा रजत जितेकी थिइन् ।

२०५४ सालमा तेक्वान्दोमा प्रवेश गरेकी मनिता झन्डै डेढ वर्ष खेलबाट हराएकी थिइन् । २०५७ मा पुनः तेक्वान्दोमा फर्केपछि उनी निरन्तर खेलाडीका रूपमा सक्रिय थिइन् । ११ वर्षअघि पुलिससँग आबद्ध रहँदा उनी तेक्वान्दोको राष्ट्रिय टोली थिइन् ।