काठमाडौं (हाम्रो खेलकुद) –हेल्प नेपाल तेस्रो आरबिबी–एनभिए क्लब लिग भलिबल प्रतियोगिताअन्र्गत पुरुषतर्फ अंक तालिकाको शीर्षस्थानमा उक्लेको छ । हेल्प नेपाल राजधानीमा जारी प्रतियोगितामा अपराजित रहदै शीर्ष स्थानमा उक्लिएको हो । हेल्प नेपालको ५ खेलबाट १५ अंक छ ।

राखेप कभर्डहलमा शुक्रबारको खेलमा हेल्प नेपालले दोहोरो सफलता हात पार्यो । पहिलो खेलमा जाउलाखेललाई २५–१८, २५–१२ र २५–१९ को सोझो सेटमा हराएको हेल्प नेपालले अर्को खेलमा नेपाल एपीएफ क्लबलाई २५–१९, २५–१७ र २५–२२ ले हरायो । त्यस्तै पुरुषतर्फ दुई विभागीय नेपाल पुलिस र त्रिभुवन आर्मीले सफलता हात पारे ।

पुलिसले बुटबलको मणिमुकुन्दलाई २५–१२, २५–१६ र २५–२१ को सोझो सेटमा हरायो । आर्मीले जाउलाखेल भलिबल प्रशिक्षण केन्द्रमाथि २५–१२, २५–७ र २५–१३ को सहज जित निकाल्यो । जारी लिगमा पुलिस दोस्रो स्थानमा रहेको छ ।

पुलिस र आर्मीले ५ खेलबाट समान १३ अंक जोडेका छन् । आर्मी तेस्रो स्थानमा झरेको छ । पुरुषतर्फ हेल्पनेपाल, पुलिस र आर्मी तीनै टिम उपाधि दौडमा कायमै छन् ।

यस्तै महिलातर्फ एपिएफले आफ्नो अग्रतालाई यथावतै राखेको छ । शुक्रबार भएको आफ्नो चौथो खेलमा एपिएफले पश्चिमाञ्चल टप्समाथि २५–९, २५–१३ र २५–१२ को सोझो जित निकाल्यो । एपीएफको ४ खेलबाट १२ अंक पुगेको छ । न्यु डायमण्ड एकेडेमीले आर्मीलाई २५–१२, २५–१४ र २५–१० को सोझो सेटमा हरायो ।

दोस्रो स्थानमा रहेको न्यु डायमण्डले ३ खेलबाट ८ अंक भएको छ । अर्को खेलमा पुलिसले जाउलाखेल भलिबल प्रशिक्षण केन्द्रमाथी २५–५,२५–७ र २५–३ को सहज जित निकाल्यो । पुलिसले ४ खेलबाट ६ अंक जोडेको छ । एपिएफसँग पराजित भएको पश्चिमाञ्चलको ३ खेलबाट ३ अंक छ ।