काठमाडौं (हाम्रो खेलकुद) – नेपाल एपिएफ क्लब महिलातर्फ र त्रिभुवन आर्मी क्लब पुरुषतर्फ राजधानीमा जारी तेस्रो आरबीबी–एनभिए राष्ट्रिय क्लब लिग भलिबल प्रतियोगिता अन्र्तगत क्लब लिगको शीर्ष स्थानमा उक्लिएको छ ।

तीन खेलमा सबैमा जित निकालेको एपिएफको ९ अंक छ । त्रिपुरेश्वरस्थित राष्ट्रिय खेलकुद परिषदको कवर्ड हलमा बिहिबार एपिएफले अर्को विभागिय टोली आर्मीलाई २५–२१, २५–१५ र २५–१४ को सोझो सेटमा हरायो ।

महिलाकै अर्को खेलमा न्यु डायमण्डले नेपाल पुलिस क्लबलाई २५–१७,२५–१४,२२–२५ र २५–२१ ले हरायो । खेल जितेपनि डायमण्डले एक अंक गुमायो । २ खेलमा डायमण्डको ५ अंक छ । २ खेलमा पुलिस ४ अंकसहित तेस्रो स्थानमा छ ।

यस्तै चार भारतीय खेलाडी सम्मिलित पश्चिमाञ्चल टप्सले लिगमा पहिलो जित निकाल्दा जावलाखेललाई २५–१०, २५–६ र २५–१३ ले हरायो । पश्चिमाञ्चल पहिलो खेलमा न्यु डायमण्डसँग पराजित भएको थियो । ३ अंक जोडेको पश्चिमाञ्चल चौथो स्थानमा छ ।

यस्तै पुरुषतर्फ त्रिभुवन आर्मी क्लबले अर्को विभागिय टोली एपिएफमाथि २५–१३, २५–१७ र २५–१३ को जित निकाल्यो । ४ खेलबाट १० अंक बटुल्दै आर्मी शीर्षसनमा यथावत छ ।

अर्को खेलमा पुलिसले ढोरपाटनलाई २५–१४, २५–१४ र २५–११ ले हरायो । पश्चिमाञ्चलले हेल्प नेपालसँगको खेल २५–२३, २५–१७ र २५–१८ ले गुमायो । प्रतियोगितामा शुक्रबार महिलातर्फ तीन र पुरुषतर्फ पाँच खेल हुदैछ ।