काठमाडौं (हाम्रो खेलकुद) – राजधानीमा जारी तेस्रो आरबीबी–एनभिए राष्ट्रिय महिला तथा पुरुष क्लब लिग भलिबल’प्रतियोगितामा न्यु डायमण्ड एकेडेमीले विजयी सुरुवात गरेको छ ।

त्रिपुरेश्वरस्थित राष्ट्रिय खेलकुद परिषदको कभर्ड हलमा बुधबार भएको खेलमा न्यु डायमण्डले भारतीय खेलाडी सम्मिलित पश्चिमाञ्चल टप्सलाई २५–२३, २५–१६ र २५–१५ ले गुमायो । महिलातर्फ त्रिभुवन आर्मीले जाउलाखेल प्रशिक्षण केन्द्रलाई २५–१३,२५–१३ र २५–१० को सोझो सेटमा हरायो ।

यस्तै पुरुषतर्फ नेपाल पुलिसले आर्मीमाथि रोमाञ्चक जित निकालेको छ । पुरुषतर्फकोे खेलमा चिर प्रतिद्धन्दी नेपाल पुलिस क्लबले नेपाल आर्मीलाई ३–२ को सेटमा स्तब्ध बनेपछि महत्वपुर्ण दुई अंक जोडेको छ । पुलिसले आर्मीलाई २५–१८, १८–२५, २३–२५, २५–२३ र १५–१२ को सेटमा पाखा लगायो ।

पुलिसले अपराजित रहदै दुइ खेलबाट ४ अंक बनाएको छ । पुलिसले एपीएफ र आर्मीसग ३–२ को सेटमा जित निकालेपछि दुवै खेलमा २/२ अंकमात्र जोड्न सफल भयो । पुलिससँग हार बेहोरेको आर्मीले ३ खेलबाट ७ अंक बटुल्दै लिगको शीर्षस्थानमा यथावत छ ।

पुरुषकै अर्को खेलमा अपराजित रहेको हेल्प नेपालले बुटवलको मनिमुकुन्दलाई २५–२२, २५–२० र २५–१७ को सोझो सेटमा हरायो । विभागिय नेपाल एपिएफले जाउलाखेल भलिबल ट्रेनिङ सेन्टरलाई २५–१७, २५–१६ र २५–१८ को सोझो सेटमा हरायो । पुरुषतर्फ नै जाउलाखेलले बुधबार भएको दोस्रो खेलमा ढोरपाटन क्लबलाई ३–१ ले हराउदै तीन अंक बटुलेको छ । जाउलाखेलले ढोरपाटनमाथी २१–२५,२५–१६,२७–२५ र २५–१८ को जित निकाक्यो ।