काठमाडौं (हाम्रो खेलकुद) – दुई विभागीय त्रिभुवन आर्मी क्लब र नेपाल पुलिस क्लब अलग अलग समूहको विजेताका रुपमा चौथो नयाँ बजार कप राष्ट्रिय खुला पुरुष भलिबल प्रतियोगिताको सेमिफाइनलमा पुगेका छन् ।

अपराजित रहँदै साविक विजेता समेत रहेको पुलिस समूह ‘क’ बाट बाट अपराजित रहदै अन्तिम चारमा पुगेको थियो । आर्मीले पनि समूह चरणका कुनै खेल हारेन र समूह ‘ख’ को विजेता बन्यो ।
समूह ‘क’ बाट एक खेल गुमाएको नेपाल एपिएफ र समूह ‘ख’ बाट पनि एक खेल गुमाएको दिप्सन फुड्स जापन आधिखोला उपविजेताका रुपमा सेमिफाइनलमा पुग्यो । सेमिफाइनलमा अब पुलिसले दिप्सन फुडस् तथा आर्मीले एपिएफको सामना गर्नेछ ।
नयाँबजार सोसल ग्राउण्डको कार्टमा दोस्रो दिन बिहीबार लिगको आफ्नो अन्तिम खेलमा पुलिसले एपिएफलाई २५–१७, २५–२० र २५–१८ को सोझो सेटमा हरायो ।
आर्मीले भारतीय खेलाडीहरुको साथ रहेको आधिखोलालाई २५–१६, २५–२३, २०–२५ र २५–१७ को सेटमा पराजित भयो । त्यसअघि आधिखोलाले पहिलो खेलमा गीताञ्जली कलेजलाई हराएको थियो ।
गीताञ्जली कलेजले लिगको आफ्नो अन्तिम खेलमा आयोजक नयाबजार सामाजिक क्लबलाई २५–२१,२५–२७,२५–१६ र २५–१४ को सेटमा हराउदै सान्त्वना जित निकाल्यो ।
शनिबार सम्म चल्ने प्रतियोगिताको विजेताले उपाधिसहित १ लाख ७५ हजार १ सय ११ रुपैयाँ तथा दोस्रो हुने टोलीले ९० हजार एक सय ११ रुपैयाँ प्राप्त गर्नेछन् । तेस्रो र चौथो टोलीले पनि नगद पुरस्कार पाउनेछन् ।