काडमाडौं (हाम्रो खेलकुद) – नयाँबजार सामाजिक युवा क्लबको आयोजनामा बुधबार सुरु हुने नयाँ बजार कप खुला पुरुष भलिबलको सबै तयारी पुरा भएको जनाएको छ । चैत २६ गते सम्म चल्ने प्रतियोगितामा तीन विभागीयसहित ८ टोलीको सहभागिता रहेको छ ।

सहभागी टिमहरुमा समूह ‘ए’ मा नेपाल पुलिस क्लब, ढोरपाटन स्पोर्टस टे«निङ सेन्टर, त्रिभुवन विश्व विद्यालय कीर्तिपुर, नेपाल एपिएफ क्लब छन् । यस्तै समूह ‘बी’ मा दिप्सन फुड्स जापान आँधिखोला, गीताञ्जली उच्च माध्यमिक विद्यालय, आयोजक नयाँबजार सामाजिक युवा क्लब र त्रिभुवन आर्मी क्लब रहेका छन् ।

सहभागी टोलीलाई अन्तर्राष्ट्रिय भलिबल संघको नियम अनुसार दुई समूहमा विभाजन गरिएको अन्तर्राष्ट्रिय रेफ्री क्यान्डिडेट कुलबहादुर रानाले बताए । नयाँ बजारस्थित सोसल मैदानको कोर्टमा हुने प्रतियोगितामा १६ लाख रुपैयाँ भन्दा बढी खर्च हुनु अनुमान रहेको
क्लबका अध्यक्ष भगवान थापाले बताए । प्रतियोगिताको विजेताले उपाधिसहित १ लाख ७५ हजार १ सय ११ रुपैयाँ प्राप्त गर्नेछ । यस्तै दोस्रो हुनेले टोलीले ९० हजार १ सय ११, तेस्रो हुनेले ५१ हजार १ सय ११ र चौथो हुनेले २५ हजार १ सय ११ रुपैँया प्राप्त गर्नेछन् ।

गतवर्षको तुलानामा यो बर्ष २५ प्रतिशतले पुरस्कार रकम बृद्धि गरिएको बताइएको छ । यस्तै उत्कृष्ट खेलाडी, उत्कृष्ट सेटर, स्पाइकर, ब्लकर, डिफेन्डर, क्विकर र प्रशिक्षक पनि पुरस्कृत हुने आयोजकले जानकारी गराएको छ ।