काठमाडौं (हाम्रो खेलकुद) – अन्तर्राष्ट्रिय भलिबल प्रतियोगितामा सहभागिताको चार दशक पछि कम्तिमा कास्य पदक पक्का गरिसकेको नेपाली भलिबल टोलीले माल्दिभ्समा जारी सेन्ट्रल जोन भलिबल च्याम्पियनसिपमा आज साँझ कीर्गिस्तानको सामना गर्दैछ ।

राउन्ड रोविन लिगको अन्तिम खेल भएकोले दुवै टोलीका लागि आजको खेल खासै अर्थपूर्ण भने छैन । आजको नतिजा जे भएपछि भोली फेरी नेपाल र कीर्गिस्तानबीच फाइनल प्रवेशका लागि ‘प्ले अफ’ खेल हुने नेपाली टोलीका सहायक प्रशिक्षक जगदिश भट्टले जानकारी दिए ।

सबै तीन खेल जितेर तुर्किमिस्तान प्रतियोगिताको फाइनलमा पुगिसकेको छ भने आयोजक माल्दिभ्स प्रतियोगिताबाट बाहिरिसकेको छ । आजको नतिजा जसको पक्षमा गएपछि राउन्ड रोविनको दोस्रो र तेस्रो टोलीबीच पुनः प्ले अफ हुनेछ । नेपाल फाइनल पुग्ने सके कम्तीमा रजत पक्का गर्नेछ ।
नेपाल र कीर्गिस्तान दुवैले तुर्किमिस्तानसँगको खेल गुमाएका थिए भने दुवैले माल्दिभ्सलाई हराएका थिए । ‘आजको खेल दुवैका लागि खासै महत्वपूर्ण छैन ’ सहयाक प्रशिक्षक भट्टले भने, ‘त्यहि हिसाबले आज केही खेलाडीलाई आराम दिने योजनामा छौं । नयाँ खेलाडीलाई अनुभवका लागि मौका दिन सक्छौ । यद्दपी खेलको अवस्था हेरेर खेलाडी परिवर्तन गर्नेछौं । ’
४१ बर्षदेखि अन्तर्राष्ट्रिय प्रतियोगिता खेल्न थालेको नेपालको पुरुष टोलीले पहिलो पटक पदक पक्का गरेको हो । सन् १९७६ मा पाकिस्तानमा काइदे आजम च्याम्पियनसिपबाट अन्तर्राष्ट्रिय भलिबलको यात्रा सुरु गरेको नेपालले १९७८, १९८२ र १९८६ मा एसियाली खेलकुदमा भाग लिएको थियो ।

१९८७ को तेस्रो दक्षिण एसियाली खेलकुद (साग) देखि निरन्तर भाग लिदै आएको नेपालले पुरुष भलिबलमा कुनै पनि पदक जित्न सकेको थिएन । सागमा नेपालको महिला टोलीले भने तीन पदक कास्य पदक जितिसकेको छ ।