काठमाडौँ (काठमाडौं) – नयाँ बजार सामाजिक युवा क्लबको आयोजनामा चौथो नयाँ बजार खुला राष्ट्रिय पुरुष भलिबल झन्डै दुई सातापछि सुरु हुने भएको छ । लिग कम नकआउटका आधारमा हुने चैत २३ देखि २६ गते सम्म प्रतियोगिताका खेल नयाँ बजार टाउन प्लानिङ स्थित सोसिएल कोर्टमा सञ्चालन हुने क्लबका अध्यक्ष भगवान थापाले शुक्रबार आयोजित पत्रकार सम्मेलनमा जानकारी दिए ।

चार दिने प्रतियोगितामा नेपाल आर्मी,नेपाल पुलिस,शसस्त्र प्रहरी बलको एपीएफ,आयोजक नयाँ बजार युवा क्लब,जाउलाखेल क्लब,स्याङ्जाको आधिखोला भलिबल क्लब,हेल्प नेपाल र ढोरपाटन क्लबको सहभागीता रहने प्रतियोगिता संयोजक पदम कुमार श्रेष्ठले बताए ।

विभागिय टोलीमा बाहेक अन्य क्लबमा भारतीय खेलाडी पनि समावेश हुन सक्ने बताइएको छ । प्रतियोगितामा सहभागी क्लबले नेपाल भलिबल संघको नियम अनुसार चार मात्र विदेशी खेलाडी सेटमा खेलाउन पाउने प्राविधिक संयोजक एवम् राष्ट्रिय रेफ्री विकास गुरुङले बताए ।

प्रतियोगिताको विजेताले एक लाख ७५ हजार १ सय ११ रुपैयाँ, दोस्रो हुनेले ९० हजार १ सय ११ रुपैयाँ ,तेस्रो हुनेले ५१ हजार १ सय ११ तथा चौथोले २५ हजार १ सय ११ रुपैयाँ प्राप्त गर्नेछ ।
बेस्ट प्लेयर तथा विधागत उत्कृष्टमा सटर,ब्लकर,डिफेन्डर,क्वीइकर र बेस्ट प्रशिक्षकलाई पुरस्कृत गरिनेछ । गत वर्ष आधिखोला स्पोट्र्स क्लबलाई हराउँदै नेपाल पुलिसले उपाधि जितेको थियो ।