काठमाडौँ (हाम्रो खेलकुद) – नेपाल ओपन एमेच्योर गल्फ च्याम्पियनसिप अन्तर्गत मंगलबार पार-७२ गोकर्ण गल्फ क्लबमा भएको दोश्रो दिनको खेलमा नेपाल ‘बि’ टोलीले टिम इभेन्टको उपाधि जितेको छ।

पहिलो दिनमा १४६ स्कोर जोडेको नेपाल ‘बि’ले दोश्रो दिनमा १४५को स्कोर बनाएपछि जित सम्भव भएको थियो। शिव कुमार माझीले पहिलो दिन ७२ र दोश्रो दिन ७३ अंक जोडे भने मंगलबार २ ओभर ७४ अंक बनाएका शुक्र बहादुर राईले इभन पार ७२ जोडे।

दोश्रो स्थानमा बंगलादेशका मोहम्मद शाह आलम र मोहम्मद सोमरात सिक्दार रहे भने तेश्रो स्थान ‘ए’ को प्रतिनिधित्व गरिरहेका टंक बहादुर कार्की र तेन्जिङ छिरिङको जोडी रह्यो।

व्यक्तिगत विधा तर्फ भने शिव कुमार माझी शिर्षस्थानमा आइपुगेका छन्। दोश्रो दिन बुधबार १ ओभर ७३ बनाएका माझीले समग्रमा १ ओभर १४५को स्कोर बनाउँदै दोश्रो स्थानमा रहेका शुक्र बहादुर राईलाई १ स्ट्रोकले पछाडी पारे। तेश्रो स्थानमा वाङचेन धन्दुप ३ ओभर १४७ लिएर बसेका छन्। पहिलो दिनमा अग्रस्थानमा रहेका हृदेश सिंह भने ४ ओभर १४७को स्कोर बनाउँदै टाशी दोङ र टाशी छिरिङसंग चौथो स्थानमा रहेका छन्।

४८ खेलाडी सम्मिलित प्रतियोगिताको अन्तिम दिन बिहिबार ३० खेलाडीले अन्तिम चरणमा सहभागी हुन पाउनेछन। साथसाथै २४ सिनियर गल्फरले ९ होलको सिनियर प्रतियोगिता पनि भोलि खेल्ने कार्यक्रम रहेको छ।