काठमाडौं (हाम्रो खेलकुद) – बंगलादेशी ग्रान्डमास्टर जिआउर रहमान र अब्दुल्लाह अलल रकिब र फिडे मास्टर हसन मेहन्दी २.५ अंकका साथ राजधानीमा जारी एसियन जोनल ३.२ चेस प्रतियोगिताको तेस्रो चरणको समाप्तीमा संयुक्त रुपमा शीर्षस्थानमा रहेका छन् ।

फिडे मास्टर मनीष हमाल

नेकोस चेस बुद्धीचाल संघ र नेकोस चेस एकेडेमी क्लबको संयुक्त आयोजनामा जारी प्रतियोगितामा मंगलबार २५२० रेटेड जिआउल हक र २४९२ रेटेड रकिब विचको खेल बराबरीमा टुंगिएको थियो । २२६३ रेटेड मेहन्दीले जित हात पारे ।

त्यसैगरी आज २०३६ रेटेड नेपालमा क्षितिज भण्डारीले २४२२ रेटेड बंगलादेशका ग्रान्डमास्टर नियाज मुर्सदलाई बराबरीमा रोक्दै अपराजित यात्रा कायम राखे । उनीसंगै पूर्व नेपाल च्याम्पियन केशब श्रेष्ठ,सुमित पन्त,फिडे मास्टर मनीष हमालले पनि अपराजित यात्रा कायम राख्दै २ अंक जोडेका छन् ।

केशब र सुमितबीचको खेल बराबरी टुंगियो । २०५२ रेटेड मनीष र बंगलादेशका २३४१ रेटेड रहमान मोहम्मद तैबुरले बराबरी खेले । नेपाल च्याम्पियन मदनकृष्ण कायस्थले पूर्व नेपाल च्याम्पियन नवीन तण्डुकारलाई हराउदै दुइ अंक पु¥याएका छन् ।

महिला तर्फ डक्लुआइएम हमिद रानी लागातार तेश्रो जित हात पार्दै शीर्ष स्थानमा छिन् । उनले तेश्रो चरणमा अर्की डक्लु आइएम समिमा अख्तरलाई हराइन् । सबिना श्रेष्ठ पराजित भइन् । श्रीलंकाकी साउमी जैनेबले पनि मतीना कुसीलाई हराउदै दुइ अंक जोडेकी छिन् । नेपाली खेलाडीमा शान्ता थापाले मोहमुदा हक चौधरी तथा सिन्दीरा जोशीले पुनम प्रसाइलाई हराइन् ।