काठमाडौं (हाम्रो खेलकुद)–नेपाल तेक्वान्दो संघको आयोजनामा राष्ट्रिय तेक्वान्दो रेफ्री सेमिनार र रिफ्रेसर कोर्स मंगलबार सुरु भएको छ । सातदोबाटोस्थित नेपाल खेलकुद विज्ञान प्रतिष्ठानको हलमा सुरु भएको सेमिनार नवौं र रिफ्रेसर कोर्ष आठौं हो ।

विश्व तेक्वान्दो महासंघ (डब्लुटिएफ)ले तेक्वान्दो खेलका केही नियम परिवर्तन गरेका कारण रेफ्री रिफ्रेसर कोर्स गरिएको हो । उक्त कोर्सको नेपाल तेक्वान्दो संघका अध्यक्ष प्रकाश शंम्सेर राणा र महासचिव दिपराज गुरुङले लगायतले उद्घाटन गरे । सो अवसरमा महासचिव गुरुङले डब्लुटिएफले तेक्वान्दोमा केही नयाँ नियम जारी गरेका कारण कोर्स सुरु गरिएको बताए ।

चैत ३ गते सम्म हुने ग्यरोगीतर्फका कोर्षमा कुल २ सय ५६ निर्णायकको सहभागीता रहेको कोर्सका प्रशिक्षक समेत रहेका गोविन्द शर्माले जानकारी दिए । जसमा नयाँ निर्णायकको लागि ८५ र रिफ्रेसरका लागि १ सय ७१ निर्णायकको सहभागीता रहेका छ ।

उक्त कोर्समा नेपाल तेक्वान्दो संघका निर्णायक कमिटीका संयोजक नविन कुमार श्रेष्ठ,कोरियन प्रशिक्षक क्वान योङ दल र गोविन्द शर्माले प्रशिक्षण दिएका छन् । कोर्स पूर्वाञ्चलको झापामा चैत ६ र ७, पश्चिमाञ्चलको बुटवलमा बैशाख ४ र ५, मध्यपश्चिमाञ्चलको नेपालगन्जमा बैशाख ७ र ८ तथा सुदूरपश्चिमाञ्चलको महेन्द्रनगरमा बैशाख १० र ११ गते हुने बताइएको छ ।