काठमाडौं (हाम्रो खेलकुद) – हुन्डाई गाडीको नेपालमा अधिकृत विक्रेता लक्ष्मी इन्टरकन्टिनेन्टल प्रालीको आयोजनामा हुन्डाई ओपन गल्फ प्रतियोगिता शनिबार आयोजना हुने भएको छ । एक दिने प्रतियोगिता गोकर्ण गल्फ क्लबमा हुने भएको हो ।

पत्रकार सम्मेलनमा लक्ष्मी इन्टरकन्टिनेन्टलका सिनियर ब्रान्ड म्यानेजर आशिष ओझा (बायाँ) र गोकर्ण गल्फ क्लबका सिनियर निर्देशक दीपक आचार्य ।

सातौं सस्करणको हुन्डाई ओपन १८ होलमा स्टेबल फोल्ड फम्र्याट र ३ र ४ ह्याण्डीक्यापको आधारमा खेलाइने आयोजकले जनाएको छ । प्रतियोगितामा झन्डै सय एमेच्योर गल्फरको सहभागिता जनाउने मंगलबार पत्रकार सम्मेलनमा जानकारी दिइयो ।

प्रतियोगिताको मुख्य आकर्षकको रुपमा होल इन वन रहेको छ । होल नम्बर १० मा होल इन वन गर्नेलाई हुन्डाई ग्राण्ड आई टेन गाडी पुरस्कार दिइने आयोजकले जनाएको छ । प्रतियोगिताका विजेता, उपविजेता र तेस्रो स्थान प्राप्त गर्ने खेलाडीले पुरस्कार प्राप्त गर्नेछन् । त्यस्तै बेस्ट ग्रोस, लेडिज विनर, लङगेस्ट ड्राइभ, क्लोजेस्ट टु पिन, मोस्ट बर्डिज क्याटेगोरी, सिनियर बिजेता (६० वर्ष माथि) ,जुनियर बिजेता (१७ वर्ष मुनी) र हुन्डाई ओनर्स विजेतालाई पनि पुरस्कार प्रदान गरिनेछ ।

विजेताले अघिल्लो सस्करणको भन्दा फरक पुरस्कार पाउने लक्ष्मी इन्टरकन्टिनेन्टलका सिनियर ब्रान्ड म्यानेजर आषिश ओझाले बताए । ओझाले अहिले नै पुरस्कारबारे घोषणा नगरेको र उक्त पुरस्कार खेलाडीको लागि सरप्राइज रहेको बताए ।
गोकर्ण गल्फ क्लबका सिनियर निर्देशक दीपक आचार्यले एमेच्योर यो प्रतियोगिता राम्रो रहेको बताउदै आयोजक इन्टरकन्टिनेन्टललाई धन्यबाद दिए । होल इन वान नेपालीले खेलाडीले पटक पटक गरेको स्मरण गर्दै भने,‘तर, दुर्भाग्य नै भन्नुपर्छ गाडी पुरस्कार राखेका बेला भने अहिले सम्म हुन सकेको छैन । ’