स्याङ्गजा (हाम्रो खेलकुद) – स्याङ्गजामा जारी धनबहादुर प्रधान स्मृति खुल्ला फिडे रेटिंग बुद्धिचाल प्रतियोगितामा शनिबार तेस्रो चरणको समाप्तीमा पूर्व नेपाल च्याम्पियनद्वय बद्रिलाल नेपाली र सिएम भुपेन्द्र निरौला तथा धनुषाका सुशील चौधरी संयुक्त रुपमा शीर्षस्थानमा रहेका छन् । उनीहरुको समान ३ अंक छ । शनिबार दोस्रो र तेस्रो चरणको खेल भएका थिए ।

स्वीस लिग ७ चरणका खेल हुने प्रतियोगितामा भक्तपुरका भेट्रान गणेशमान दुवाल र चितवनका सुमित पन्तले २ जित र एक बराबरी खेलेर साढे २ अंक जोडेका छन् । यसैगरी पूर्व नेपाल च्याम्पियन नविन तण्डुकार, कास्कीका सुनिल कोइराला र रन्जन कुँवर, दमकका विक्रम सिंह, स्याङ्गजाका गणेश श्रेष्ठ, ईश्वर पराजुलि, विपन पराजुलि, छविलाल नेपाली, प्रवेश भुजेल, अर्विन कुमार बस्याल, शोभाकान्त ढकाल र रोशन थापाले समान २ अंक प्राप्त गरेका छन् ।
स्याङ्गजा जिल्ला बुद्धिचाल संघको आयोजनामा पुतलीबजारस्थित लक्ष्मीस्मृति पुस्तकालयमा संचालित खेलमा ३ जना पूर्व नेपाल च्याम्पियनहरुसहित १३ जिल्लाका ४० जनाको सहभागिता छ । ८० हजार रुपैयाँ पुरस्कार रहेको प्रतियोगिताका शीर्ष १८ खेलाडीले नगद पुरस्कार प्राप्त संघका अध्यक्ष शेर जङ्ग अधिकारीले जानकारी दिए ।