काठमाडौं (हाम्रो खेलकुद)- पुरुषोत्तम सिलवालले अपराजित रहँदै गोकर्णेश्वर नगर मेयर कप खुल्ला फिडे रेटिङ बुद्धिचाल प्रतियोगिताको‌ उपाधि जितेका छन्।

पुरुषोत्तम‌ ९ चरणको क्लासिकल खेलमा ७ जित र २ बराबरी गर्दै ८ अंक जोडेर च्याम्पियन भएका हुन्।

गत महिना भएको २५ औं राष्ट्रिय बुद्धिचालमा दोश्रो भएका १९३७ रेटेड १९ वर्षे पुरुषोत्तमले अन्तिम तीन चरणको खेलमा भारतीय खेलाडीमाथि हाबी भएका थिए।

पुरुषोत्तमले २१५८ रेटिङ पर्फोम गर्दै व्यक्तिगत ८८ फिडे रेटिङ्ग बढाउन सफल भए । उनले नगद ५१ हजार रुपैयाँ सहित ट्रफि हात प्राप्त गरे ।

गोकर्णेश्वर नगरपालिका वडा नं. ८ स्थित बौद्ध इन्टरनेसनल स्कुलमा भएको प्रतियोगिताको अन्तिम चरणको खेलपछि २०७० रेटेड एफएम क्षितिज भण्डारी ७ अंक  प्रोग्रेसिभ ४८ प्वाइन्टका आधारमा दोश्रो भए‌। उनले २५ हजार रुपैयाँ प्राप्त गरे।

भारतका १७१८ रेटेड मज इकबाल समान ७ अंकमा प्रोग्रेसिभ ४७ प्वाइन्ट जोडेर तेस्रो भए । उनले १६ हजार रुपैयाँ प्राप्त गरे। नेपालका १९६५ रेटड सिएम सजिन महर्जनले चौथो हुँदै ८ हजार रुपैयाँ पाए ।

प्रतियोगितामा महिलातर्फ राष्ट्रिय च्याम्पियन सिन्दिरा जोशी उपाधि जितिन् । सिनियर खेलाडी राजेन्द्रप्रसाद श्रेष्ठ, स्थानीय सुमन मोक्तान, उत्कृष्ट अनरेटेड प्रयास कोइराला र अंकित पौडेल, ईलो १८ सय मुनि सुशील सुवेदी र कविन्द्र सिवाकोटी विजयी भए । 

सरी नै ईलो १६ सय मुनि भारतका साहिद हुसेन र कविर केसी, उत्कृष्ट विद्यार्थी आदित्य गजुरेल, अग्रिम सैंजु र आयुष भण्डारी, उत्कृष्ट स्थानीय विद्यार्थीमा ससरज राउत, प्रिसियस अधिकार र संस्कृति गवुरुल, उत्कृष्ट युवा १२ बर्षमा हार्दिक पन्त, रिजोन केसी र अग्रता आचार्य रहेका छन्। 

क्लबका अध्यक्ष मोहन कार्कीको सभापतित्वमा सम्पन्न समापन समारोहमा गोकर्णेश्वर नगरपालिकाका मेयर दिपक कुमार रिसालले विजेता खेलाडीलाई पुरस्कृत गरे।
माउण्ट एभरेष्ट चेस एण्ड सोसियल क्लबको आयोजना र
गोकर्णेश्वर नगरपालिकाको प्रायोजनमा प्रतियोगिता फागुन १४ सुरु भएको थियो।