चितवन (हाम्रो खेलकुद)- गोर्खाली रग्बी क्लबले प्रथम गोर्खाली रग्बी सेभेन्सको उपाधि जितेको छ।

भरतपुरको कृष्णपुर खेल मैदानमा भएको प्रतिस्पर्धात्मक फाइनलमा गोर्खालीले त्रिभुवन आर्मी क्लबलाई १२-७ को स्कोरले पराजित गर्यो।

खेलको निर्धारित समय ७-७ स्कोरले बराबरी भएको थियो। त्यसपछिको थप समयमा गोर्खालीले गोल्डेन स्कोर गर्दै च्याम्पियन बनेको हो। गोर्खालीका कप्तान यदु अधिकारीले गोल्डन स्कोर गरेका हुन्।

विजेता टोलीले २ लाख रुपैंया प्राप्त गर्यो। नेपाली रग्बी खेलको इतिहासमा यो अहिले सम्मको सर्वाधिक पुरस्कार राशी हो। दोस्रो टोलीले १ लाख रुपैंया प्राप्त गर्यो।

गोर्खाली रग्बी क्लबका भारतीय खेलाडी जावेद हुसेन प्रतियोगिताका उत्कृष्ट खेलाडी बन्न सफल भए।
यसअघिको सेमिफाइनलनमा आर्मीले कर्णाली प्रदेशलाई १७-१२ स्कोरले पराजित गरेको थियो।

त्यो खेलको निर्धारित समय पनि १२-१२ को स्कोरमा बराबरी भएको थियो। खेलको अन्तिम समयमा कर्णालीले एउटा सहज कन्भर्जनमा पाएको २ स्कोर गर्न चुक्दा टोलीको फाइनल पुग्ने सकेन । त्यसपछिको थप समयमा आर्मीले गोल्डन स्कोर गर्दै जोड्दै फाइनलमा स्थान बनाएको थियो।

दोस्रो सेमिफाइनल खेलमा आयोजक गोर्खालीले एपीएफलाई २९-० स्कोरले सहजै पराजित गर्यो।
एकतर्फी रुपमा टुंगिएको खेलमा गोर्खाली शुरुआत देखि नै हावी देखिएको थियो। खेलमा एपीएफले कुनै अंक जोड्न सकेन।

प्रतियोगिताका विजेता टोलीहरुलाई राष्ट्रिय खेलकुद परिषदका सदस्य सचिव टंकलाल घिसिङ, गोर्खाली रग्बी क्लबका अध्यक्ष रोहित कार्की, राइट पथका एमडी फिलिप केसी, नेपाल रग्बी संघका वरिष्ठ उपाध्यक्ष चेतनराज गिरीलगायतले पुरस्कृत गरे।