एजेन्सी – विश्व कप लिग टु अन्तर्गतको खेलमा अमेरिकाले नामिबियामाथि सहज जित हात पारेको छ ।

शुक्रवार भएको खेलमा अमेरिकाले नामिबियामाथि ७० रनको जित हासिल गरेको हो । अमेरिकाले दिएको २ सय ६९ लक्ष्य पछ्याएको नामिबिया ४३.३ ओभरमा १ सय ९८ रनमा समेटियो ।

नामिबियाका लागि ओपनर जान ग्रिनले सर्वाधिक ६५ रन जोडे । उनले ९० बलमा ७ चौका प्रहार गरे । रुवेन ट्रम्पलम्यानले ३५ बलमा ७ चौका र २ छक्काको सहयोगमा ५५ रन जोडे ।

जान निकोल लफ्टी इटनले २८, कप्तान जेर्राड एरास्मस ११ तथा मलान कु्रजर १२ रनमा आउट भए । अमेरिकाका लागि सौरभ नेत्रभाल्कर र मिलान्ड कुमारले समान ३, जसदिप सिंहले २ तथा नोश्तुश केन्जिगे र हर्मित सिंहले समान १ विकेट लिए ।

त्यसअघि ओमानको मस्कटमा टस हारेर पहिले ब्याटिङ गरेको अमेरिकाले निर्धारित ५० ओभरमा ९ विकेट गुमाएर २ सय ६८ रनको योगफल तयार गरेको थियो ।

अमेरिकाका लागि ओपनर आन्द्रेस गौसले सर्वाधिक ८३ रन जोडेका थिए । उनले १ सय ५ बलको सामना गरेर ९ चौका प्रहार गरेका थिए । कप्तान मोनांक पटेलले ६७ बलमा ४ चौकाको सहयोगमा ५३ रन जोडेका थिए ।

सञ्जय कृष्णमुर्ती २९ बलमा ४१, आरोन जोन्सले २७ बलमा ३१ तथा जसदिप सिंह १५ रनमा आउट भए । नामिबियाका लागि बेर्नाड स्कोट्जेले १० ओभरमा २२ रन खर्चिएर ५ विकेट लिए । ज्याक ब्रेसेल्सले २ तथा जेजे स्मिथ र रुबेन ट्रम्पलम्यानले समान १ विकेट लिए ।

जितसँगै अमेरिका १५ खेलमा २० अंकका साथ शीर्ष स्थानमा छ । पराजित नामिबिया समान खेलमा १२ अंकका साथ छैठौं स्थानमा छ । नेपाल ६ अंकका साथ पुछारबाट दोस्रो स्थानमा छ ।

विश्व कप लिग टु सिरिज २०२३ देखि २०२७ सम्म जारी रहनेछ । लिगमा ८ टोली सहभागी लिगको शिर्ष ४ टोली विश्व कप छनोटमा सिधै स्थान बनाउँदा ४ टोली विश्व कप छनोटका लागि प्लेअफमा स्थान बनाउँने छन् ।