काठमाडौं (हाम्रो खेलकुद)- खोल्चा पुखु खेलकुद समितिको आयोजनामा हुने प्रथम पुष्पराज शाक्य स्मृति टेबलटेनिस प्रतियोगितालाई ललिपतुर महानगरपालिका वडा ११ ले मुख्य प्रायोजन गर्ने भएको छ ।

आयोजक समितिका अध्यक्ष नदिमरत्न शाक्य र वडा ११ का अध्यक्ष अरोजकुमार खड्गीले सोमवार सो सम्बन्धी सम्झौता पत्रमा हक्षताक्षर गरे ।

प्रतियोगिता सञ्चालन गर्न करिब ८ लाख रुपैयाँ खर्च हुने बताइएको छ । अध्यक्ष खड्गीले प्रतियोगिताका लागि ५ लाख बजेट विनियोजन गरिसकेको र नपुग रकमको हकमा पनि वडाले सक्दो सहयोग गर्ने प्रतिबद्धता जनाए ।

प्रतियोगितामा विभिन्न ६ स्पर्धामा १ सय ५० भन्दा बढी खेलाडीले प्रतिस्पर्धा गर्ने छन् । महिला/पुरुष सिंगल्स, भेट्रान ४० वर्षमाथि, ५० वर्षमाथि र ६० वर्षमाथि पुरुष सिंगल्समा खेल हुनेछ ।

ललितपुर महानगरपालिका वडा ११ का खेलाडी मात्र खेल्न पाउने गरी यु–१६ मिक्स युथ स्पर्धा पनि राखिएको छ । महिला/पुरुष सिंगल्समा शीर्ष ३२ वरियताका खेलाडीले नाम दर्ता गराइसकेको अध्यक्ष शाक्यले बताए ।

प्रतियोगिताको कुल पुरस्कार राशी २ लाख रुपैयाँ रहेको छ । महिला/पुरुषको सिंगल्समो विजेताले ३०, दोस्रोले १५ हजार र तेस्रोले ७ हजार ५ सय रुपैयाँ प्राप्त गर्नेछन् । बाँकी ४ स्पर्धामा पहिलो हुनेले १० हजार, दोस्रोले ५ हजार र तेस्रो ले २ हजार ५ सय रुपैयाँ पुरस्कार पाउने छन् ।

ललितपुर जिल्ला टेबलटेनिस संघको प्राविधिक सहयोगमा हुने रात्रीकालीन प्रतियोगितालाई इलाभेन स्टार क्लब र इखाछें स्पोर्ट्सले सहयोग गर्ने भएका छन् ।
स्पिन इभेन्ट प्रा.लि. को व्यवस्थापन हुने ३ दिने प्रतियोगिताका खेलहरु शंखमुलस्थित इलेभन स्टार क्लबमा हुनेछ ।
इन्जिनियर पुष्पराज शाक्यको गत वर्ष निधन भएको थियो । ललितपुरमै भएको पाँचौं मेयर कप टेबलटेनिसको भेट्रान स्पर्धामा खेल्ने क्रममै हृदयघाटका कारण शाक्यको निधन भएको थियो ।