पुलिस पहिलो पटक टाइगर कप भलिबल च्याम्पियन

पोखरा (हाम्रो खेलकुद)- नेपाल पुलिस क्लबले एनसेल टाइगर कप भलिबल प्रतियोगिताको पुरुषतर्फ पहिलो पटक च्याम्पियन बनेको छ।

पोखरा रंगशालामा भर्खरै सकिएको फाइनल खेलमा गण्डकी प्रदेशलाई ३–१ को सेटले पराजित गर्दै पुलिसले पाँचौं सस्करणको उपाधि जितेको हो ।

पहिलो, दोस्रो र चौथो सेटमा जित निकाल्दै पुलिसले उपाधि जितेको हो । पहिलो सेट २५–२३ र दोस्रो सेट २५–२१ ले जितेको पुलिसले तेस्रो सेट २०–२५ ले गण्डकीलाई सुम्पिएको थियो ।

दोस्रो सेटमा १२–१५ को अग्रतालाई उल्टाउँदै पुलिसले २५–२१ को जित निकालेको थियो । चौथो सेट २५–२२ ले जित निकाल्दै पुलिस उपाधि चुम्न सफल रह्यो ।

त्यसअघि भएको महिलातर्फको फाइनलमा एपिएफ क्लबलाई ३–२ को सेटले पराजित गर्दै आयोजक टोली टाइगर ग्रुपले पहिलो पटक उपाधि जितेको थियो ।

दुवैतर्फ विजेताले ५ लाख ८५ हजार ५ सय ५५ रुपैयाँ तथा दोस्रोले २ लाख ८५ हजार ५ सय ५५ रुपैयाँ प्राप्त गर्यो।