काठमाडौं(हाम्रो खेलकुद) – टिपटप हेल्प नेपाल स्पोर्ट्स क्लबसँग पराजित भएसँगै एपिएफ क्लब एनसेल पाँचौं टाइगर कप भलिबल प्रतियोगिताको पुरुषतर्फबाट बाहिरिएको छ ।

पोखरा रंगशालामा बुधवार भएको खेलमा हेल्प नेपालसँग ३-२ को सेटले पराजित भएपछि एपिएफ प्रतियोगितबाट बाहिरिएको हो ।

तेस्रो र चौथो सेटमा उत्कृष्ट पुनरागमन गरेको एपिएफले पाँचौं सेटमा सम्हालिन नसक्दा प्रतियोगितबाट बाहिरिनुपर्यो । हेल्प नेपालले पहिलो सेट २५–२२ र दोस्रो सेट २९–२७ ले आफ्नो पक्षमा पारेको थियो ।

हेल्प नेपालले तेस्रो सेट १३–२५ र चौथो सेट २३–२५ ले गुमाएको थियो । पहिलो र दोस्रो सेट गुमाएको एपिएफले तेस्रो र चौथो सेटमा उत्कृष्ट पुनरागमन गर्दा खेल पाँचौं सेटमा धकेलिएको थियो ।

पाँचौं सेटमा सुरुवातबाटै अग्रता लिँदै हेल्प नेपालले १५–१२ ले जित निकाल्यो ।

हेल्प नेपालले अब लिग चरणको अन्तिम खेल गण्डकी प्रदेशसँग खेल्नेछ । उक्त खेलमा जित निकाल्ने टोलीले एलिमिनेटर खेल्नेछ । पराजित हुने टोली प्रतियोगितबाट बाहिरिनेछ ।

यसअघि आजै भएको खेलमा महिलातर्फ एपिएफ क्लबले आयोजक टाइगर ग्रुपलाई ३–० को सोझो सेटमा पराजित गरेको थियो ।

आजै भएको अर्को खेलमा ट्राभल इन्क्वारी प्यासन भलिबल क्लब थाइल्यान्डले सान्त्वना जित निकालेको थियो ।

ट्राभल इन्क्वारीले आफ्नो अन्तिम खेलमा त्रिभुवन आर्मी क्लबलाई ३–१ को सेटले पराजित गरेको हो । पुरुषतर्फ अहिले भारतको सुनिल भलिबल क्लब र आर्मीबिच खेल भइरहेको छ।