काठमाडौं (हाम्रो खेलकुद)- हेटौंडामा जारी २५ औं पुरुष राष्ट्रिय बुद्धिचाल प्रतियोगितामा रौतहटका एफएम रुपेश जैसवालले शीर्षतालाई कायम राखेका छन्।

मंगलवार पाँचौं चरणको समाप्तिमा ४.५ अंक बनाउँदै १ अंकको अग्रता कायम गरेका छन्।  रुपेशले वर्तमान नेपाल च्याम्पियन झापाका राजन सुवेदीलाई पराजित गरेका छन्।

राजनले २३औं चालमा रुक सि सेभेन गलत मुभ चाल्दा बि सिक्स पाउन गुमाउन पुगेका थिए। लगत्तै ए सेभेन पाउन पनि त्याग्नु पर्दा खेल रुपेशको पक्षमा गएको थियो। 

मकवानपुरका क्षितिज भण्डारी र झापाका शुश्रुत दहालले समान ३.५ अंक जोडेर संयुक्त दोश्रो स्थानमट छन् । एफएम क्षितिजले काठमाडौंका सिएम नवीन तण्डुकारलाई र सिएम शुश्रुतले भक्तपुरका विनय थापा लाई हराए ।

समान ३ अंकका साथ दोलखाका आशिष फुयाल, काठमाडौंका पुरुषोत्तम सिलवाल र एफएम रिजेन्द्र राजभण्डारी संयुक्त रुपमा तेस्रो स्थानमा छन् ।

सिन्दिराको एकल अग्रता १० औं महिला राष्ट्रिय बुद्धिचाल प्रतियोगिताको पाँचौ खेल सकिँदा वर्तमान च्याम्पियन सिन्दिरा जोशीले ४.५ अंक जोडेर अग्रता बनाएकी छिन्। सिन्दिराले ४ जित र १ बराबरी खेलेकी छिन् ।

प्रतियोगितामा पहिलो हार व्यहोरेका काठमाडौंकी एञ्जल महर्जन र विनिता कपाली ४ अंकका साथ संयुक्त रुपमा दोश्रो स्थानमा छिन्।

यस्तै बाँकेकी इशा गिरि र मोरङकी शान्ति धिमाल समान ३.५ अंक लिएर संयुक्त तेस्रो स्थानमा छन्।

नेपाल बुद्धिचाल महासंघको आयोजनामा सञ्चालन भइरहेको राष्ट्रिय बुद्धिचाल प्रतियोगिताका थप दुई चरणको खेल बुधवार हुनेछ । प्रतियोगिता १९ गते सम्म चल्ने छ।