काठमाडौं (हाम्रो खेलकुद)- केबी साम नेपाल कबड्डी लिग (एनकेएल) मा विराटनगर ब्यान्डिट्सले पहिलो क्वालिफायरमा स्थान बनाएको छ।

लिग चरणको अन्तिम खेलमा शनिवार प्ले अफमा पुगिसकेको विराटनगरले पोखरा लेकर्सलाई ५०-२५ को सहज नतिजामा हरायो।

राष्ट्रिय खेलकुद परिषदको कभर्ड हलमा भएको खेलमा विराटनगरले पोखरालाई कुनै पनि मौका दिएन। पहिलो हाफमा २१-१२ को अग्रता बनायो।‌ दोस्रो हाफमा पनि यही लयलाई निरन्तरता दिंदा विराटनगरले बिना दबाब खेल जित्यो।

पोखराले कुल २५ स्कोर गर्दा विराटनगरले टचबाट मात्रै २१ स्कोर गर्यो। तीन पटक अल आउटको सफलता विराटनगरले हात पार्यो। १७ स्कोर ट्याकलबाट र ६ स्कोर बोनसबाट निकाल्यो।

पराजित पोखराले टचबाट १४ बोनसबाट ६ र ट्याकलबाट ५ स्कोर मात्र बनायो। योसँगै पोखराले एक खेल पनि जित्न सकेन। ४ अंकका साथ यो सिजन पुरा गर्दै लिगबाट बाहिरियो।

विराटनगरको भने यो चौथो जित हो। उसले कुल २१ अंक बनाएर दोस्रो स्थानमा रहँदै पहिलो क्वालिफायरमा स्थान सुरक्षित गरेको हो।

पहिलो क्वालिफायरमा विराटनगरले जनकपुर नाइट्ससँग माघ १४ गते खेल्नेछ। जनकपुर २३ अंक सहित लिग चरणमा शीर्षस्थानमा रहँदै क्वालिफायरमा पुगेको हो।

जनकपुर अपराजित एक मात्र टोली हो। उसले लिग चरणमा ४ खेल जित्दा काठमाडौंसँग बराबरी खेलेको थियो। लिग चरणमा भने जनकपुरले विराटनगरलाई ४०-३८ ले हराएको थियो।

पहिलो इलिमेनेटरमा धनगढी वाइल्ड क्याट्स र हिमालयन रेडर्सबीच खेल हुनेछ। धनगढी २ जित सहित ११ अंकका साथ तेस्रो स्थानमा रहेर प्ले अफमा पुगेको हो। हिमालयनले भने लिगमा मात्र एक खेल जितेको थियो। ७ अंक सहित चौथो स्थानमा रहँदै प्ले अफमा स्थान बनाएको हो।