काठमाडौं(हाम्रो खेलकुद) – टाइगर कप भलिबल प्रतियोगिताको पहिलो दिनको तेस्रो खेल खराब प्रकाशका कारण बीचमा नै रोकिएको छ ।

विभागीय टोली त्रिभुवन आर्मी क्लब र आयोजक टाइगर ग्रुपबिचको शनिवारको तेस्रो तथा अन्तिम खेल खराब प्रकाशका कारण रोकीएको हो । रोकिएको खेल आइतबार पुन: पहिलो सेटबाट नै सुरु हुने भएको छ ।

खेल रोकिदा आर्मी २-१ सेटले अघि थियो । तेस्रो सेटको समाप्तिसँगै खेलका लागि चाहिने भन्दा कम प्रकाश भएसँगै खेल रोकिएको हो । खेलमा पहिलो र दोस्रो सेट जितेको आर्मीले तेस्रो सेट भने गुमाएको थियो ।

पहिलो सेट आर्मीले २५-२३ र दोस्रो सेट २५-२२ ले जितेको थियो । तेस्रो सेटमा भने आर्मी २१-२५ ले पराजित भएको थियो ।

प्रतियोगिताको आजै भएको पहिलो खेलमा नेपाल एपिएफ क्लबले थाइल्याण्डको क्लबलाई, दोस्रो खेलमा टिप टप न्यु डायमन्डले नेपाल पुलिस क्लबलाई समान ३-२ ले हराएको थियो ।

त्यसअघि सुचना तथा सूचना प्रविधि मन्त्री पृथ्वी सुब्बा गुरुङ उद्घाटन गरेका थिए । माघ १९ गते सम्म चल्ने प्रतियोगितामा २ विदेशी टोलीसहित महिला र पुरुषमा समान ६ टोलीको सहभागिता छ ।

विदेशी टोलीका रुपमा महिलातर्फ युनाइटेड प्यासन भलिबल क्लब, थाइल्यान्ड र पुरुषतर्फ भारतको सुनिल भलिबल क्लब, कुरुक्षेत्रको टिम सहभागी हुने छन् ।

पुरुषतर्फ हेल्प नेपाल स्पोर्टस् क्लब, गण्डकी प्रदेश भलिबल संघ, नेपाल पुलिस क्लब, त्रिभुवन आर्मी क्लब र नेपाल एपिएफ क्लबले प्रतिस्पर्धा गर्नेछन् ।

महिलातर्फ सहभागी टोलीमा नेपाल एपिएफ क्लब, टिपटप न्यू डायमन्ड स्पोर्टस् क्लब, त्रिभुवन आर्मी क्लब, नेपाल पुलिस क्लब र टाइगर ग्रुप अफ पोखरा नेपाल छन् ।

प्रतियोगिताका दुवैतर्फको‌ विजेता टोलीले समान ५ लाख ८५ हजार ५ सय ५५ रुपैयाँ पाउनेछन् । दोस्रो टोलीले समान २ लाख ८५ हजार ५ सय ५५ र तेस्रो टोलीले १ लाख ८५ हजार ५ सय ५५ रुपैयाँ पाउने आयोजकले जनाएको छ ।

प्रतियोगिताको सर्वोत्कृष्ट खेलाडीले समान २५ हजार ७ सय ७७ रुपैयाँ प्राप्त गर्नेछन् । विधागततर्फ उत्कृष्ट हुनेलाई समान १० हजार ५ सय ५५ रुपैयाँ प्रदान गरिने छ ।