काठमाडौं (हाम्रो खेलकुद)- विराटनगर ब्यान्डिट्स केबी साम नेपाल कबड्डी लिग (एनकेएल) को प्ले अफमा प्रवेश गरेको छ।

त्रिपुरेश्वरस्थित राष्ट्रिय खेलकुद परिषदको कभर्ड हलमा शुक्रवार भएको दिनको पहिलो खेलमा हिमालयन रेइडर्सलाई ३४–३० ले पराजित गर्दै विराटनगरले अघिल्लो चरणको यात्रा पक्का गरेको हो।

योसँगै प्ले–अफमा पुग्ने तीन टोलीको टुंगो लागेको छ। काठमान्डु माभरिक्स र जनकपुर नाइट्स एक खेल अगावै प्ले अफमा पुगिसकेका छन्। अब एक टोलीले प्ले अफमा स्थान बनाउने छन्।

हिमालयनविरुद्ध रेडमा विराटनगरले १८, ट्याकलबाट आठ, दुई अलआउटबाट चार र बोनसबाट चार अंक जोडेको हो। हिमालयनले भने रेडबाट १४, ट्याकलबाट नौ, एक अलआउटबाट दुई र बोनसबाट पाँच अंक जोड्यो।

पहिलो हाफमा विराटनगरले तीन अंकको अग्रता लिँदै हिमालयनलाई दबाबमा राखेको थियो। त्यो अग्रता अन्तिमसम्म पनि कायम राख्दै विराटनगर तेस्रो जित निकाल्न सफल भएको हो।

जनकपुर शतप्रतिशत जितसहित २० अंक जोडेर शीर्ष स्थानमा छ। काठमान्डु र विराटनरको समान १६ अंक छ। तेस्रो हार बेहोरेको हिमालयन ४ खेलबाट ६ अंक बटुल्दै पाँचौं स्थानमा छ।

पहिलो हाफमा विराटनगरले रेडबाट १०, ट्याकलबाट दुई, एक अलआउटबाट दुई र बोनसबाट चार पोइन्ट जोडेको थियो। हिमालयनले भने रेडबाट १५, रेडबाट नौ, ट्याकलबाट तीन, एक अलआउटबाट २ र बोनसबाट १ अंक मात्रै बटुल्न सक्यो।