काठमाडौं (हाम्रो खेलकुद)- केबी साम नेपाल कबड्डी लिग (एनकेएल) मा जनकपुर नाइट्सले लगातार चौथो जित दर्ज गर्न सफल भएको छ।

जनकपुरले बिहीवार दोस्रो खेलमा पोखरालाई ३६-२९ को नतिजामा हरायो। पोखराको यो लगातार चौथो हार हो।

त्रिपुरेश्वरस्थित राष्ट्रिय खेलकुद परिषद्को कभर्ड हलमा भएको दोस्रो खेल कम स्कोरको भयो। पहिलो हाफमा जनकपुरले १८-१३ को अग्रता बनायो।

१८ स्कोर गर्ने क्रममा जनकपुरले पोखरालाई एक पटक अल आउट गर्यो। पहिलो हाफमा टचबाट १२ स्कोर गर्यो। पहिलो जितको खोजीमा रहेको पोखराले भने बोनसबाट ७ र टचबाट ६ स्कोर गर्यो।

दोस्रो हाफमा पनि दुवै टिमबाट धेरै स्कोर हुन सकेन। तर दबाब भने जनकपुरले नै बनायो। अग्रतालाई जोगाउन जनकपुर सफल रहयो।

दोस्रो हाफमा पनि जनकपुरले एक पटक अल आउटको सफलता प्राप्त गर्यो। जनकपुरले टचबाट २१, ट्याकलबाट ८, अल आउटबाट ४ र बोनसबाट ३ स्कोर गर्यो्।

उसको लागि च्याफोन कामुन्नेले सर्वाधिक १८ स्कोर गरे। उनले १५ स्कोर टचबाट मात्रै जोडेका थिए।
पराजित पोखराले टचबाट १५, बोनसबाट १२, र ट्याकलबाट २ स्कोर गरेकप थियो।

लगातारको चौथो जितमा जनकपुरले २० अंक सहित शीर्षस्थानमा छ। लगातार ४ खेल हारेको पोखरासँग ४ अंक रहेको छ। ४ खेलमा नै हारेपनि पोखराले प्रत्येक खेलमा ७ अंकको अन्तरमा मात्र खेल हारेको छ।

दिनको पहिलो खेलमा घनश्याम रोक्का मगरको प्रभावशाली प्रदर्शनमा धनगढी वाइल्ड क्याट्सलाई ५१-३६ को सहज नतिजामा हराउँदै काठमाडौं माभरिक्सले तेस्रो जित हात पारेको छ।