काठमाडौं (हाम्रो खेलकुद)- केबी साम नेपाल कबड्डी लिग (एनकेएल) मा घनश्याम रोक्का मगरको प्रभावशाली प्रदर्शनमा धनगढी वाइल्ड क्याट्सलाई ५१-३६ को सहज नतिजामा हराउँदै काठमाडौं माभरिक्सले तेस्रो जित हात पारेको छ।

त्रिपुरेश्वरस्थित राष्ट्रिय खेलकुद परिषदको कभर्ड हलमा आज भएको पहिलो खेलमा काठमाडौंले पुरै खेल अवधिभर दबाब बनाउँदै सहज जित निकाल्न सफल भएको हो। पहिलो हाफमा दुई अल आउट सहित टचबाट १७ स्कोर गर्दै काठमान्डौले २७-१६ को अग्रता बनायो।

दोस्रो हाफमा धनगढी खेलमा फर्कन सकेन । दुवै हाफमा धनगढीले काठमाडौंलाई एक पटक पनि अल आउट गर्न सकेन। काठमाडौंले भने दोस्रो हाफमा पनि एक पटक अल आउटमा स्कोर जोड्यो। काठमाडौंले टचबाट सर्वाधिक २६ र ट्याकलबाट १२ तथा बोनसबाट ७ र अल आउटबाट ६ स्कोर बनायो।

काठमाडौंको जितमा आज पनि कप्तान तथा मार्की घनश्यामको प्रदर्शन अब्बल रहयो। काठमाडौंले जोडेको ५१ स्कोर मध्ये घनश्यामको योगदान २६ स्कोरको रहयो। उनी एक्लैले टचबाट १९, बोनसबाट ६ र ट्याकलबाट २ स्कोर गरे।

पराजित धनगढीले टचबाट १४ तथा ट्याकलबाट र बोनसबाट समान ११ समकोर गर्यो। ४ खेलमा काठमाडौंले १६ अंक बनाएको छ। चार खेलमा धनगढीको यो तेस्रो हार हो। उसँग मात्र ६ अंक रहेको छ।