पोखरा (हाम्रो खेलकुद) – धरानका प्रो निरज तामाङले सूर्य नेपाल वेस्टर्न ओपनको दोस्रो दिन भुवन कुमार रोक्कालाई एक स्ट्रोकले पछि पारेका छन् । लगातार दोस्रो दिन शीर्षस्थानमा कायमै रहेका उनको अग्रता मात्र एक स्ट्रोकमा झरेको छ ।

हिमालयन गल्फ कोर्समा दोस्रो दिनको खेल सुरू गर्दा निरजसँग दुई स्ट्रोकको अग्रता थियो । भुवनले २-अन्डर ६७ को स्कोर निकाले। समग्रमा ४-अन्डर १३४ को नतिजामा उनले निरजलाई चुनौती दिएका छन् ।

बाक्लो हुस्सुको कारण खेल दुई घण्टा ढिला सुरू भयो। जसका कारण विभिन्न ६ होलबाट सट गन प्रणालीमा खेल सुरू गरियो। सूर्य नेपाल गल्फ टुरको इतिहासमा सट गनबाट खेल खेलाइएको यो पहिलो पटक हो। जहाँ लिडर निरजलर भने पहिलो होलबाट नै खेलको सुरूवात गरे। चौथो र आठौं होलमा एक-एक सट बचाए भने सातौं होलमा बोगी खेपे। रन्ट नाइन १-अन्डर ३३ मा सकाए। यसपछि १०औं होलमा बर्डी प्रहार गर्दा २-अन्डर स्कोर बनाइसकेका थिए। तर चार पारको १३औं होलमा टि सट हजार्डमा गएपछि। उनले यो होलमा ट्रीपल बोगीको सामना गरे। तर यो खराब प्रदर्शन बिर्सदै १७ औं र १८औं होलमा बर्डी प्रहार गर्दै ब्याक नाइन इभन-पार ३५ मा पुरा गरे।

भुवनले पहिलो नौ होलमा पार जोगाउँदै फ्रन्ट नाइन इभन-पार ३४ खेले। ११औं होलमा एक सट जोगाए। तर
१४औं होलमा डबल बोगी खेपेे। यसपछि १५औं देखि १७औं लगातार तीन बर्डी सहित ब्याक नाइन २-अन्डर ३३ मा सकाए।

समग्रमा इभन-पार १३८ को स्कोर बनाएका धन बहादुर थापा र सञ्जय लामा संयुक्तरुपमा तेस्रो स्थानमा रहे। धन र सञ्जय दुवैले १-ओभर ७० को स्कोर दर्ज गरे। जयराम श्रेष्ठ र एमेच्योर सुन्दर राई संयुक्तरुपमा पाँचौं स्थानमा छन्। उनीहरूले समग्रमा २-ओभर १४० स्कोर निकाले।

एमेच्योरतर्फ सुन्दर राईले सुमन परियारलाई ६ स्ट्रोकले पछि पार्दै शीर्षस्थानमा रहन सफल रहे। सुन्दर समग्रमा २-ओभर १४० को स्कोरमा छन्। सुमनले समग्रमा ८-ओभर १४६ स्कोर बनाए।

३६ होलको समाप्तीमा १५-ओभर १५३ स्कोर गरेका २१ प्रो र ६ एमेच्योर गरी कुल २६ गल्फरले कट बनाएका छन्। ५४ होलको तीन दिने प्रतियोगितामा कुल पुरस्कार ८ लाख ८२ हजार रहेको छ। विजेताले १ लाख ५० हजार तथा दोस्रो र तेस्रो हुनेले क्रमशः १ लाख र ७२ हजार प्राप्त गर्नेछन। शीर्ष २१ मा पर्ने गल्फरहरूले पनि नगद हात पार्नेछन।