काठमाडौं (हाम्रो खेलकुद)– तेन्जिङ छिरिङले सूर्य नेपाल वेस्टर्न ओपनको दोस्रो दिन पनि आफ्नो अग्रतालाई कायम राखेका छन् । तेन्जिङले दोस्रो दिन मंगलबारको खेल समाप्त हुँदा ६ स्ट्रोक्सको अग्रता बनाएका छन् । राष्ट्रिय टोलीका सदस्य समेत रहेका तेन्जिङले दोस्रो दिन २ अन्डर ७० को प्रदर्शन गरे ।

सूर्य नेपाल गल्फ टुर २०१६/०१७ अन्तर्गतको चौथो प्रतियोगितामा दुई दिनमा तेन्जिङको प्रदर्शन ८ अन्डर १ सय ४४ को रहेको छ । गोकर्ण गल्फ क्लबमा दोस्रो दिन इभन पार ७२ को कार्ड बनाएका सञ्जय लामा दोस्रो स्थानमा छन् । दुई दिनमा उनले २ अन्डर १ सय ४२ को प्रदर्शन गरेका छन् ।

इभन पार १ सय ४४ को कार्ड बनाउँदै रवि खड्का तेस्रो स्थानमा छन् । बुधबार उनले एक ओभर ७३ को कार्ड बनाएका छन् । इभन पार ७२ को कार्ड बनाएका नेपालका नम्बर एक व्यवसायिक गल्फर शिवराम श्रेष्ठ चौथो स्थानमा छन् । दुई दिनमा उनले १ ओभर १ सय ४५ को कार्ड बनाएका छन् । ४ ओभर ७६ को कार्ड बनाएका भूवन नगरकोटी (२ ओभर १ सय ४६) पाँचौं स्थानमा छन् ।

धनबहादुर थापाले दोस्रो दिन १ ओभर ७३ को प्रदर्शन गर्दा दुई दिनमा उनको कार्ड ४ ओभर १ सय ४८ रहेको छ । दीपक आचार्य सातौं स्थानमा छन् । बुधबार ३ ओभर ७५ को कार्ड बनाएका दीपकले समग्रमा ५ ओभर १ सय ४९ को प्रदर्शन गरेका छन् । बलभद्र राईले ६ ओभर १ सय ५० को प्रदर्शन गरे । उनले बुधबार ५ ओभर ७७ को कार्ड बनाएका थिए ।

एमेच्योर टंकबहादुर कार्की र जयराम श्रेष्ठ पनि शीर्ष १० भित्र रहेका छन् । टंक र जयरामले ७ ओभर १ सय ५१ को कार्ड बनाएका छन् । दुवैले दोस्रो दिन ४ ओभर ७६ को प्रदर्शन गरे ।

फ्रन्ट नाइनमा २ अन्डर ३४ को प्रदर्शन गर्ने क्रममा तेन्जिङले पहिलो होलमा बर्डिबाट सुरु गरेका थिए । उनले पाँचौं र सातौंमा पनि बर्डि गरे । तर उनले पार ३ को आठौं होलमा बोगी खेपे । ब्याक नाइनमा ११ औं र १७ औं होलमा बर्डि गरेपनि उनले १४ औं र १५ होलमा बोगी खेपे । जसका कारण ब्याक नाइनमा उनको प्रदर्शन इभन पार ३६ को रह्यो ।

सञ्जयले फ्रन्ट र ब्याक नाइन दुवैमा इभन पार ३६ को कार्ड बनाए । फ्रन्ट नाइमका छैटौं होलमा पार गर्नबाट चुकेका उनले सातौं होलमा बर्डि गरेका थिए । त्यस्तै ब्याक नाइनमा ११ औं र १२ होलमा बर्डि गरेपछि सञ्जयले १४ औं र १७ औं होलमा बोगी खेपे ।

रविले दिनको सुरुआत बर्डि बाट गरेपनि दोस्रो होलमै उनले बोगी सामना गरे । त्यतिमा उनको खराब प्रदर्शन रोकिएन । फ्रन्ट नाइनमा ३ ओभर ३९ को कार्ड बनाएका उनले पाँचौं, छैटौं र सातौं हालमा पनि बोगी खेपे । ब्याक नाइनमा भने उनले प्रदर्शनमा सुधार गरे । ११ औं र १४ औं होलमा बर्डि गरेका उनले २ अन्डर ३४ को कार्ड बनाए ।

शिवरामले फ्रन्ट र ब्याक नाइन दुवैमा इभन पार ३६ को प्रदर्शन गरे । फ्रन्ट नाइनको दोस्रो, पाँचौं र छैटौंमा बर्डि गरेपनि उनले पहिलो, सातौं र आठौं होलमा बोगी खेपरेका थिए । ब्याक नाइमा भने उनले १५ औं होलमा बर्डि गर्नुअघि १४ औं होलमा बोगी खेपेका थिए ।
दुई दिनको खेलपछि २१ व्यसायिक र ६ एमेच्योर खेलाडीले कट बनाएका छन् । अन्तिम ३६ होलमा शीर्ष १० बाहेक रामे थापा, पशुपति शर्मा, यलम्बर सिंह अधिकारी, सूर्यप्रसाद शर्मा, पूर्णप्रसाद शर्मा, दीपक मगर, ध्रुब केसी, सिबी भण्डारीले प्रतिस्पर्धा गर्नेछन् ।

त्यस्तै कृष्णमान राजवहाक, प्रदीपकुमार लामा, रामकृष्ण श्रेष्ठ, कुमार कार्की र शिवकुमार पौडेलले पनि अन्तिम दुई दिनको खेलमा प्रतिस्पर्धा गर्नेछन् । टंक र जयरामबाहेक कट बनाउने एमेच्योरमा तासी घले, पृथ्वी मल्ल, मिथुन राई र शुक्रबहादुर राई छन् ।