पोखरा (हाम्रो खेलकुद)- सूर्य नेपाल वेस्टर्न ओपनको २५ औं‌ संस्करणको पहिलो दिन बुधवार निरज तामाङ दुई स्ट्रोकको अग्रता बनाउँदै शीर्षस्थानमा रहेका छन् ।

४-अन्डर ६५ को स्कोरमा निरजले युवराज भुजेल र भुवन कुमार रोक्कालाई २ स्ट्रोकले पछि पारे। पोखराको हिमालयन गल्फ कोर्समा उत्कृष्ट सुरुवात गर्दै
निरजले बोगी रहित फ्रन्ट नाइन खेले।

तेस्रो र चौथो होलमा एक-एक सट बचाए। फ्रन्ट नाइनमा २-अन्डर ३२ को प्रदर्शन गरे। उनले १५औं होलमा एक सट खेर फाले। १०औं, १३औं र १६औं होलको बर्डीले ब्याक नाइन २-अन्डर ३३ मा पुरा गरे।

उनले सिजनको तेस्रो प्रतियोगिता सूर्य नेपाल वेस्टर्न ओपन जितेका थिए। उनी करियरको तेस्रो प्रमुख उपाधि जित्ने दाउमा छन्।

युवराज र भुवन २-अन्डर ६७ को स्कोरमा संयुक्तरुपमा दोस्रो रहे। धरानका प्रो युवराजले फ्रन्ट नाइन १-अन्डर ३३ मा सकाए। उनको फ्रन्ट नाइनको प्रदर्शन उतारचढावले भरिएको थियो।

दोस्रो र तेस्रो होलमा बर्डी प्रहार गरे। तर पाँचौं होलमा डबल बोगीको समाना मात्र गरेनन्। लगतै सातौं होलमा बोगी प्रहार गरे। यसपछि आठौं र नवौं होलमा एक-एक सट बचाए। ब्याक नाइन उनले १-अन्डर ३४ मा सकाए। १३औं देखि १५औं होलसम्म लगातार तीन बर्डी प्रहार गरे तर १०औं र १८औ होलमा बोगी खेपे।

भुवनले तेस्रो र पाँचौं होलको बर्डीको मद्दतले फ्रन्ट नाइन २-अन्डर ३२ मा सकाए। यसपछि ११औं होलमा डबल बोगी खेपे। १६औं र १७औं होलको बर्डीले ब्याक नाइन इभन-पार ३५ मा पुरा गरे।

धन बहादुर थापा र सञ्जय लामाले १-अन्डर ६८ मा पहिलो दिनको खेल सकाए। उनीहरू संयुक्तरुपमा चौथो स्थानमा रहे। रामे मगर र जयराम श्रेष्ठले छेटौं स्थान बाँडे। उनीहरूले आज इभन-पार ६९ मा खेल सकाए।

एमेच्योरतर्फ सुन्दर राई १-ओभर ७० सहित शीर्षस्थानमा रहेका छन्। उनले सुरेश तामाङलाई एक स्ट्रोकले पछि पारे। सुरेशले पहिलो दिन २-ओभर ७१ स्कोर गरे।

५४ होलको तीन दिने प्रतियोगितामा ३४ प्रोफेसनल र १८ एमेच्योर गल्फरले प्रतिस्पर्धा गरिरहेका छन। प्रतियोगिताको कुल पुरस्कार ८ लाख ८२ हजार रहेको छ। विजेताले १ लाख ५० हजार, दोस्रोले १ लाख र तेस्रोले ७२ हजार रुपैयाँ प्राप्त गर्नेछन्। शीर्ष २१ मा पर्ने गल्फरले पनि नगद हात पार्नेछन्।

नेपाल प्रोफेसनल गल्फर्स एसोसिएसनद्वारा आयोजित र सूर्य नेपाल प्रा.लि. द्वारा प्रायोजित प्रतियोगितामा ३६ होलको समाप्तिमा कट लागु हुनेछ। शनिबार प्रो-एम प्रतियोगिता हुनेछ।