काठमाडौं (हाम्रो खेलकुद) – केबी साम नेपाल कबड्डी लिग (एनकेएल) मा जनकपुर नाइट्सले सानदार कमब्याकमा विराटनगर ब्यान्डिट्सलाई ४०-३८ को झिनो अन्तरमा हरायो।

जनकपुरको यो लगातार तेस्रो जित हो। विराटनगरले भने पहिलो हार बेहोर्यो। त्रिपुरेश्वरस्थित राष्ट्रिय खेलकुद परिषद्को कभर्ड हलमा भएको दिनको दोस्रो खेलमा विराटनगर र जनकपुर दुवै लगातार तेस्रो जित निकाल्ने दाउमा थिए।

जहाँ विराटनगरले सुरुवात राम्रो गर्यो। ९-५ को अग्रता रहेको अवस्थामा विराटनगरका सुशिल चुनाराले सुपर रेडमा जनकपुरलाई अल आउट गरिदिए। एकै पटकमा उनले ५ स्कोर गरे। सहजै विराटनगरले पहिलो हाफमा २२-१५ को अग्रता बनायो।

तर दोस्रो हाफ भने रोमाञ्चक बन्यो। जनकपुरले सानदार कमब्याक गर्यो। निरन्तरको स्कोरले जनकपुर विराटनगरलाई दबाब‌ दिन सफल रहयो। सहिद अन्सारीले दुई अंक जोड्दा जनकपुरले खेललाई ३०-३० को बराबरीमा पुर्यायो।

त्यसपछि जनकपुरका कप्तान रामु टमाटाले विराटनगरका कप्तान कल्याण भुजेललाई टच आउट गर्दा जनकपुरले अल आउटको सफलता प्राप्त गर्यो। यो सँगै जनकपुरले ३३-३० को अग्रता बनायो।

त्यसपछि यो अग्रतालाई जोगाउँदै ४०-३८ को रोमाञ्चक जित दर्ज गर्यो। जनकपुरको जितमा च्याफोन कामुनेले सर्वाधिक १३ स्कोर गरे।

जनकपुरले टचबाट १७, ट्याकलबाट १४ बोनसबाट ४ र अल आउटबाट ४ स्कोर गर्यो। पराजित विराटनगरले टचबाट सर्वाधिक १३, ट्याकलबाट र बोनसबाट समान ११ तथा अल आउटबाट ११ स्कोर जोड्यो।

लगातार तेस्रो जितमा १५ अंक सहित जनकपुर शीर्षस्थानमा कायमै रहेको छ। तीन खेलमा दुई जित र एक हारको नतिजामा विराटनगरसँग ११ अंक रहेको छ।

दिनको पहिलो खेलमा काठमाडौं माभरिक्सले
हिमालयन रेडर्सलाई ५६-३४ को फराकिलो अन्तरमा हराउँदै महत्वपूर्ण ५ अंक जोड्न काठमाडौं सफल रहयो।

भोलि एक खेल हुनेछ। जहाँ धनगढी वाइल्ड क्याट्स र पोखरा लेकर्सबीच प्रतिस्पर्धा हुनेछ।