काठमाडौं (हाम्रो खेलकुद)- काठमाडौं माभरिक्सले
केबी साम नेपाल कबड्डी लिग (एनकेएल) मा दोस्रो जित हात पारेको छ।

हिमालयन रेडर्सलाई मंगलवार ५६-३४ को फराकिलो अन्तरमा हराउँदै महत्वपूर्ण ५ अंक जोड्न काठमाडौं सफल रहयो।

त्रिपुरेश्वरस्थित राष्ट्रिय खेलकुद परिषद्को कभर्ड हलमा भएको दिनको पहिलो खेलमा काठमाडौंले एकपक्षीय दबाब बनायो।

पहिलो हाफमा तीन पटक काठमाडौंले हिमालयन रेडर्सलाई अल आउट गर्यो। १८ अंक ट्याकलबाट मात्र जोड्दा पहिलो हाफमा काठमाडौंले ३६-१३ को सानदार अग्रता बनायो।

दोस्रो हाफमा पनि हिमालयन निरिह बन्यो। स्कोर जोडिरहन सफल काठमाडौंले चौथो पटक दोस्रो हाफमा हिमालयनलाई अल आउट गर्यो। दोस्रो हाफमा एक पटक भने हिमालयनले काठमाडौंलाई अल आउट गरेको थियो। तर यसले कुनै असर गरेन्।

आजको यो खेलमा काठमाडौंका मोहम्मद मिजानुर रेहमानको प्रदर्शन अब्बल रहयो। उनी एक्लैले २१ स्कोर गरे। टचबाट १६, ट्याकलबाट ३ र बोनसबाट २ स्कोर गर्दै टिमलाई सानदार जित दिलाए। काठमाडौंका कप्तान घनश्याम रोक्का मगरले १८ स्कोरको योगदान दिए।

काठमाडौंले बनाएको ५६ स्कोर जारी लिगको सर्वाधिक स्कोर पनि बनेको छ। यसअघि धनगढी वाइल्ड क्याट्स विरूद्ध विराटनगर ब्यान्डिट्सले ४६ स्कोर गरेको थियो।

काठमाडौंले टचबाट सर्वाधिक २७, ट्याकलबाट १५, अल आउटबाट ८ र बोनसबाट ६ स्कोर गर्यो। हिमालयनले टचबाट १९, बोनसबाट १०, ट्याकलनबाट ३ र अल आउटबाट २ अंक जोड्यो।

तेस्रो खेलमा दोस्रो जित सहित काठमाडौं ११ अंक बनाएको छ। हिमालयन रेडर्सको यो दोस्रो हार हो। टोलीको ५ अंक छ।