काठमाडौं (हाम्रो खेलकुद)- केबी साम नेपाल कबड्डी लिग (एनकेएल) मा पोखरा लेकर्सलाई ३४-३० ले हराउँदै हिमालयन रेडर्सले पहिलो जित निकालेको छ। पोखराको भने यो लगातार दोस्रो हार हो।

राष्ट्रिय खेलकुद परिषद्को कभर्ड हलमा आइतवार दिनको दोस्रो खेलको पहिलो हाफ फितलो रह्यो। दुवै टोलीले बोनस र टचबाट स्कोर गर्ने प्रयास गरे। पहिलो हाफमा हिमालयनले १३-११ को अग्रता बनायो।

दोस्रो हाफको सुरुवातमा नै हिमालयनले पोखरालाई अल आउट गर्दा १७-१२ को अग्रता बनायो। यसपछि निरन्तर अग्रता बनाएको हिमालयनका कप्तान गणेश बहादुर पार्कीले पोखरालाई अल आउट गरे।

यो सँगै हिमालयनले पोखरालाई ११ स्कोरले पछि पारी सकेको थियो। तर पोखराका नागेश्वरले सुपर रेडमा चार स्कोरको सफलता प्राप्त गरे।

खेललाई २६-२२ मा पुर्याए। यसपछि कमब्याकको प्रयासमा रहेको पोखराले हिमालयनका खगेन्द्र राज जोशीलाई आउट गर्दै दुई अंक जोड्दा खेल २९-२९ को बराबरीमा पुग्यो। तर गणेशले सुपर रेडबाट तीन स्कोर गरेसँगै हिमालयनले पोखरालाई ३४-३० ले माथ दियो।

हिमालयनको जितमा कप्तान गणेशले सर्वाधिक १३ स्कोर गरे। उनले टचबाट ११ तथा बोनस र ट्याकलबाट समान १/१ स्कोर गरे।

खेलमा हिमालयनले रेडबाट १७, ट्याकलबाट १३ र अलआउटबाट ४ स्कोर गरे। पराजित पोखराले भने रेडबाट २०, ट्याकलबाट ८ र अल आउटबाट २ स्कोर गर्यो। जितमा हिमालयनले ५ अंक जोड्दा पोखराले २ अंक बनाएको छ।

प्रतियोगितामा सोमवार धनगढी वाइल्ड क्याट्स र जनकपुर नाइट्सबीच खेल हुनेछ।