काठमाडौं (हाम्रो खेलकुद)- राष्ट्रिय बिच भलिबको महिला र पुरुष दुवैतर्फ विभागीय जोडी मात्रै सेमिफाइनल पुग्न सफल भएको छ।

महिलातर्फ नेपाल पुलिस क्लब र एपिएफका दुवै जोडी सेमिफाइनल पुगेको छ । पुरुष दुवैतर्फ एपिएफको दुवै टोली तथा त्रिभुवन आर्मी क्लब र पुलिसको‌ समान एक जोडी सेमिफाइनल पुगेको छ ।

सिन्धुपाल्चोकको चौतारा सागाँ चोकगढी नगरपालिकाको‌ सुकुटेस्थित भोटेकोशी बिच रिसोर्टमा शुक्रवार आर्मी क्लबकाका टिकराज तामाङ र सूर्य परियारको जोडीले आफ्नै क्लबका दीनेश चन्द र महेश पन्तको जोडीलाई २-० सेटले हरायो।

आठौं राष्ट्रिय बिच भलिबल क्वाटरफाइनलमा एपिएफको बलिराम चौधरी र रमेश विकको जोडीले मधेश प्रदेशको विनय चौधरी र धिरेश चौधरीको जोडीलाई २-० सेटले पराजित गर्यो।

पुलिसका चन्द्र कुवँर र सफल विकको जोडीले आफ्नै क्लबका रविन चन्द र पहल गहतराजको जोडीलाई २-१ सेटले हराउँदै सेमिफाइनल पुगेको हो।

एपिएफका महेन्द्र श्रेष्ठ र राजकुमार निरौलाले कर्णाली प्रदेशका जयप्रकाश पुन र दीपक नेपालीको जोडीलाई २-० सेटले हरायो।

आजै हुने सेमिफाइनलमा आर्मीका टिकराज र सूर्यको जोडीले एपिएफका बलिराम र रमेशको जोडीको सामना गर्नेछ। अर्को सेमिफाइनल पुलिसका चन्द्र र सफलको जोडी तथा एपिएफको महेन्द्र र राजकुमारको जोडीबिच हुनेछ।

दुवै सेमिफाइनलमा पुलिस र एपिएफ जोडी भिड्ने

एपिएफको रस्मिता दुरा र जस्ना महतोको जोडीले सुदूरपश्चिम प्रदेशका संगिता विष्ट र सरिता चन्दको जोडीलाई २-० सेटले हराउँदै सातौं महिला राष्ट्रिय बिच भलिबलको सेमिफाइनलमा पुगेको छ।

काभा महिला बिच भलिबलको विजेता पुलिसका कमला पुन र मनिषा चौधरीको जोडीले आर्मी क्लबका सुनिता राई र भावना डाँगीको जोडीलाई २-० सेटले हराउँदै सेमिफाइनलमा पुगेको हो।

क्वाटरफाइनलमा एपिएफका निरुता ठगुन्ना र नेविका चौधरीको जोडीले गण्डकी प्रदेशका सोइङ थापा र प्रतीक्षा सेनठकुरीलाई २-० को सेटले पराजित गर्यो।

पुलिसका पुनम चन्द र कामना विष्टको जोडी बागमतीको मिना जर्घामगर र सविना भुजेलको जोडीलाई २-० सेटले हराउँदै सेमिफाइनलमा पुगेको छ।

आजै हुने सेमिफाइनलमा एपिएफका रस्मिता र जस्नाको जोडीले पुलिसका कमला र मनिषाको जोडीको सामना गर्नेछ। अर्को सेमिफाइनल एपिएफका निरुता र नेविकाको जोडी तथा पुनम र कामनाको जोडीबीच हुनेछ।

नेपाल भलिबल संघको वार्षिक कार्यक्रममा रहेको च्याम्पियनसिपलाई जिल्ला भलिबल संघ सिन्धुपाल्चोक र सिन्धु सुकुटे पर्यटन व्यवसायी संघले आयोजना गरेको हो।