सुमन अधिकारी,बुटवल

बुटवलमा अर्को महिना सर्वाधिक पुरस्कार राशीको प्रथम अल नेपाल ओपन स्नुकर च्याम्पियनसिप हुने भएको छ ।

नेपाल बिलियाड्र्स स्नुकर एन्ड पुल एसोसिएसन रुपन्देही र खस्यौली स्नुकर क्लबको आयोजनामा फागुन १२ गते देखि स्नुकर प्रतियोगिता गर्न लागिएको एसोसियसनका अध्यक्ष सुजल पुनले बताएका छन् ।

सिंह कम्प्लेक्सस्थित खस्यौली स्नुकर क्लबमा हुने प्रतियोगितामा देशभरबाट १ सय २८ खेलाडीले भाग लिने अध्यक्ष पुनले बताए ।

प्रतियोगिताको विजेताले ३ लाख ३ हजार, दोस्रोले १ लाख १ हजार रुपैयाँ र हाइएस्ट ब्रेकरले ५५ हजार रुपैयाँ पुरस्कार प्राप्त गर्नेछन् ।

सेमिफाइनलमा पुग्ने खेलाडीलाई १० हजार रुपैयाँ, राइजिङ स्टार र अनुशासित खेलाडीलाई स्नुकर स्टिकबाट प्रदान गरिने जनाइएको छ ।

नेपालमा हालसम्म काठमाडौंमा भएको प्रतियोगिताका विजेतालाई २ लाख ५५ हजार रुपैयाँ राशिको पुरस्कार प्रदान गरिएको र त्यो रेकर्डलाई तोड्दै बुटवलमा नेपालकै सर्वाधिक राशीको प्रतियोगिता आयोजना गर्न लागेको दावी अध्यक्ष पुनले बुटवलमा आयोजित पत्रकार सम्मेलनमा बताए ।

खेल संयोजक विजय गुरुङका अनुसार बुटवल बाहिरबाट आउने खेलाडीहरूलाई आवासको व्यवस्था आयोजकबाट गरिने छ । प्रतियोगिता अधिकतम १० दिनसम्म सञ्चालन हुने संघले जनाएको छ ।