काठमाडौं (हाम्रो खेलकुद) – बंगलादेशको राजधानी ढाकामा गत शनिबार सम्पन्न जेन जी फाईट नाईट साउथ एसियन बक्सिङ च्यापियनसिपमा नेपालबाट सहभागि खेलाडीलाई सम्मान गरिएको छ ।

ललितपुरमा एक कार्यक्रममाझ नेपाल प्रोफेशनल बक्सिङ कमिसन र सिल्क ट्रान्सपोर्ट प्रालि ले सयुक्त रुपमा खेलाडीहरुलाई सम्मान गरेको हो । सम्मान कार्यक्रममा ६१ केजी तौल समुहमा विजयी भएका अनिल कुमार पुन मगर, ५९ केजी तौल समुहमा सहभागी पुरन राई, ६३ केजी तौल समुहमा सहभागी महेन्द्र बहादुर चन्द सहित प्रशिक्षक प्रेम पाउजुलाई नगद सहित कदरपत्र प्रदान गरिएको थियो ।

सोहि अवसरमा वल्ड बक्सिङ काउन्सिलबाट रिङ अफिसियल कोर्ष सम्पन्न गरी पहिलो प्रोफेशनल रेफ्रिजज बन्न सफल भएका राजन प्रजापतिलाई पनि सम्मान गरिएको थियो । प्रजापतिले बंगलादेशमा सम्पन्न उक्त जेन जी साउथ एसियन बक्सिङ च्यापियनसिपमा पनि रेफ्रिको भूमिका निभाएका थिए ।

बक्सिङका वरिष्ठ प्रशिक्षकहरु, खेलाडीहरु सहित करिब ४० जनाको उपस्थितिमा सम्पन्न उक्त कार्यक्रममा सिल्क ट्रान्सपोर्टकका प्रमुख कार्यकारी अधिकृत रमेश शेर्पाले व्यावसायिक बक्सिङ, खेलाडी र समग्र खेलकुदको विकासका निम्ति विभिन्न तवरले सहयोग गर्दै आएको जानकारी दिए । उनले आगामी दिनमा पनि नेपाल प्रोफेशनल बक्सिङ कमिसन संग सहकार्य गर्दै प्रतिवद्धता व्यक्त गरे ।