काठमाडौं (हाम्रो खेलकुद) – सुरुवाती तीन दिन अग्रता लिएका व्यावसायिक गल्फर तोरण विक्रम शाहीलाई एक स्ट्रोकले पछि पार्दै युवा एमेच्योर गल्फर राहुल विकले सूर्य नेपाल सेन्ट्रल ओपनको उपाधि जितेक छन् । उनको करियरको यो पहिलो उपाधि हो ।

गोकर्ण गल्फ कोर्षमा प्रतियोगिताको अन्तिम दिन विहीबार ५-अन्डर ६७ को उत्कृष्ट स्कोर सहित समग्रमा १२-अन्डर २७६ को नतिजामा अनुभवी प्रो तोरण विक्रम शाहीलाई पछि पारे । एमेच्योर गल्फरको रूपमा सूर्य नेपाल टुरको प्रो उपाधि जित्ने उनी पाँचौ खेलाडी बनेका छन् ।

उच्च लयमा रहेका लगातार तीन दिनका लिडर तोरणसँग अन्तिम १८ होलको खेल सुरू गर्दा चार स्ट्रोकको स्पष्ट अग्रता थियो। तोरणसँग अन्तिम दिनको समूहमा एमेच्योरद्वय सदभाव र राहुल थिए। अनुभव र चार स्ट्रोकको अग्रताले तोरणको उपाधि सम्भावना बलियो थियो । तर पहिलोपटक लिडर ग्रुपमा रहेर खेलेका राहुलले आत्मविश्वासी प्रदर्शन गरे ।

बोगी रहित फ्रन्ट नाइन खेल्ने क्रममा दोस्रो, तेस्रो, सातौं र नवौं होलमा बर्डी प्रहार गरे । फ्रन्ट नाइन ४-अन्डर ३२ मा सकाए । यता तोरणले पहिलो होलको बोगी विरूद्ध तेस्रो होलको बर्डीले फ्रन्ट नाइन इभन-पार ३६ मा पुरा गरे। यो स्कोरमा फ्रन्ट नाइनको खेल सकिंदा राहुलले खेललाई बराबरीमा पुर्याए । तोरण र राहुल समान ११-अन्डरमा थिए ।

यसपछि बाँकी नौ होलको खेलमा तोरण र राहुलबीच कडा प्रतिस्पर्धा चल्यो । कहिले राहुल त कहिले तोरणले अग्रता बनाउँदा खेल रोमाञ्चक बन्यो । राहुलले ११औं र १२औं होलमा बर्डी प्रहार गरे । तोरणले भने १०औं र १३औं होलमा एक-एक सट बचाए । १५औं होलमा बोगी प्रहार गरे । १५औं होलपछि खेल बराबरीमा पुग्यो ।

१६औं होल राहुलको लागि टर्निङ प्वाइन्ट बन्यो । उनले करिब २५ फिटबाट पट इन गर्दै बर्डी प्रहार गरे । राहुलले एक स्ट्रोकको अग्रता बनाए । १७औं होलमा दुवैले बोगी र १८औं होलमा दुवैले पार खेल्दा राहुलले एक स्ट्रोकको अग्रतामा उपाधि जिते । १८ औं होलमा राहुलले बर्डी पट चुकेपछि तोरणसँग खेललाई प्लेअफमा लग्ने अवसर त थियो । तर उनले झन्डै १० फिट टाढाबाट गरेको पट होलको निकै नजिकबाट पार भयो । राहुलले दाबेदार सदभावलाई ५ स्ट्रोकले हराउँदै एमेच्योरतर्फको पनि उपाधि जिते ।

डिफेन्डिङ च्याम्पियन सदभावले पहिलो र तेस्रो होलमा बर्डी प्रहार गरेपनि दोस्रो छैटौं र नवौं होलको बोगीले फर्न्ट नाइन १-ओभर ३७ मा सकाए। यसपछि १०औं, ११औं, १४औं र १७औं होलमा एक-एक सट बचाए भने १५औं होलमा डबल बोगी मात्र खेपेनन १८औं होलमा एक सट खेर फाले। ब्याक नाइन १-अन्डर ३५ मा सकाए। उनी समग्रमा तेस्रो र एमेच्योरतर्फ दोस्रो भए।

समग्रमा ३-अन्डर २८५ सहित धरानका प्रो निरज तामाङ र नेपाल नम्बर एक प्रो भुवन नगरकोटीले संयुक्तरुपमा चौथो स्थान बाँडे । निरजले आज १-ओभर ७३ र भुवनले २-अन्डर ७० मा खेल सकाए । उनीहरूले समान ८७ हजार ५ सय नगद पुरस्कार प्राप्त गरे । यसैगरी समग्रमा इभन-पार २८८ को नतिजामा सुनिल केसी र जयराम श्रेष्ठ संयुक्तरुपमा छैटौं भए । सुनिलले २-अन्डर ७० र जयरामले इभन-पार ७२ को स्कोर दर्ज गरे। दुवैले जनही ५८ हजार नगद आफ्नो नाममा लेखाए ।

प्रतियोगिताका विजयी खेलाडीहरूलाई सूर्य नेपाल प्रालिका मार्केटिङ भाइस प्रेसिडेन्ट दीप्रा लहरी र पिजिए नेपालका सल्लाहकार घनश्याम थापाले पुरस्कार वितरण गरे। चार दिने प्रतियोगितामा कुल नगद पुरस्कार ८ लाख ८२ हजार रहेको थियो। प्रतियोगितामा ३४ प्रोफेसनल र १३ गरी कुल ४७ खेलाडीले प्रतिस्पर्धा गरे । सिजनको दोस्रो प्रतियोगिता सूर्य नेपाल काठमाडौं ओपन डिसेम्बर १० देखि १४ सम्म रोयल नेपाल गल्फ क्लबमा हुनेछ ।