सिड्नी (हाम्रो खेलकुद) – नेपाली राष्ट्रिय महिला भलिबल टोलीकी स्टार स्पाइकर सरस्वती चौधरी अष्ट्रेलिया आइपुगेकी छिन् ।

नेपाली समुदायबीच हुने भलिबल प्रतियोगितामा सहभागिता जनाउन सरस्वती आइतबार अस्ट्रेलियाको सिड्नी आइपुगेकी हुन् । उनले डिसेम्बरमा आयोजना हुने पुरुष तथा महिला भलिबल प्रतियोगितामा म्याग्दी काली युनाइटेडबाट खेल्नेछिन् । एपिएफबाट छुट्टि लिएर अष्ट्रेलिया पुगेकी उनी अर्को महिना नेपाल फर्कने कार्यक्रम रहेको एपिएफ क्लबले जानकारी दिएको छ ।

६ फिट उचाइ भएकी सरस्वती नेपाली महिला राष्ट्रिय टोली तथा विभागीय नेपाल एपिएफ क्लबकी भरपर्दो स्पाइकर हुन् । नेपाली महिला भलिबल टोली र एपिएफले प्राप्त गरेको सफलतामा उनको प्रदर्शन उच्च छ ।

सन् २०१३ मा नेपालमै भएको माल्दिभ्ससँगको दुई मैत्रीपुर्ण खेलबाट उनले राष्ट्रिय टोलीमा डेब्यु गरेकी थिइन् । त्यसयता चोटबाहेक उनी राष्ट्रिय टोलीमा नियमित रहँदै आएकी छिन् । उनले नेपालबाट अफिसियल र अन अफिसियल गरी १३ प्रतियोगिता खेलिसकेकी छिन् ।

नेपालले १२औं दक्षिण एसियाली खेलकुद (साग) मा कास्य पदक जित्दा र १३औं सागमा ऐतिहासिक रजत पदक र सेन्ट्रल जोनमा दुईपटक स्वर्ण जित्दा उनी टोलीकी महत्त्वपूर्ण सदस्य थिइन् । यस्तै गत अगस्टमा नेपालमै भएको काभा महिला भलिबल लिगमा दोस्रो हुँदा उनी टोलीमा मुख्य भूमिकामा थिइन् । उनी उक्त लिगमा बेस्ट अपोजिट हिटर घोषित भएकी थिइन् ।

यस्तै गत सेप्टेम्वरमा माल्दिभ्समा भएको काभा महिला क्लब च्याम्पियनसिपमा विभागीय नेपाल पुलिस क्लबले उपाधि जित्दा उनी टोलीको महत्वपुर्ण सदस्य थिइन् । एपीएफबाट उनी लोनमा त्यहाँ पुगेकी थिइन् ।

धनगढीकी सरस्वतीले पोखराको फिस्टेल एकेडेमीबाट भलिबलको सुरुवात गरेकी थिइन् । फिस्टेल एकेडेमीपछि उनी वि.स. २०७० मा विभागय नेपाल पुलिस क्लबमा आबद्ध भएकी थिइन् । त्यसयता एपिएफले वर्षमा दर्जन बढी उपाधि जित्दा उनी सर्वाेत्कृष्टसँगै विभिन्न विधामा उत्कृष्ट भइरहिन् ।