डालस (हाम्रो खेलकुद) – कप्तान रोहित पौडेल शतकबाट चुक्दा नेपालले आईसीसी विश्वकप लिग-२ त्रिकोणात्मक सिरिजमा अमेरिकालाई २८७ रनको लक्ष्य दिएको छ ।

ग्राण्ड प्रेरी क्रिकेट रंगशाला डालसमा टस हारेर पहिला ब्याटिङको निम्तो पाएको नेपालले ५० ओभरमा अल आउट हुँदै २८६ रन बनायो ।

नेपालका कप्तान रोहित पौडेलले ७५ बलमा ८ चौका र ३ छक्कासहित ९६ रनको इनिङ खेले । शतक बनाउन उनलाई अन्तिम दुई बलमा ८ रन चाहिँएको थियो । पाँचौं बलमा सौरभ नेत्रवालकरलाई चौका हानेपनि अर्को बल मिस भएपछि शतकबाट चुकेका थिए ।

आसिफ शेख ५३ बलमा ७ चौका र १ छक्कासहित ५२ रनमा आउट भए । अनिल साह पनि ६२ बलमा ५ चौकासहित ५६ रनमा आउट भए ।

नेपाललाई ओपनर अनिल साह र आसिफ शेखले १५.४ ओभरमा ९८ रनको साझेदारी गर्दै उत्कृष्ट सुरुवात दिलाएका थिए ।

आसिफ जसदीप सिंहको बलमा विकेटकिपर मनांक पटेलबाट क्याच आउट भए । त्यसपछि कुशल भुर्तेल ११ रनमा आउट हुँदा नेपाल ९८-० को अवस्थाबाट २४.१ ओभरमा १२१-३ को अवस्थामा पुगेको थियो । त्यसपछि आरिफ शेख ३७, दीपेन्द्रसिंह ऐरी १३, गुल्सन झा १ र सोमपाल कामी २ रनमा आउट भए ।

अमेरिका स्पिनर नोष्थुश केन्जिगेले १० ओभरमा ५२ रन खर्चेर ४ विकेट लिए । हरमीत सिह, शाड्ली भान शाक्ली र जसदीप सिंहले १-१ विकेट लिए ।