पोखरा (हाम्रो खेलकुद)– सूर्य नेपाल वेस्टर्न ओपन गल्फको पहिलो दिन रवि खड्काले अग्रता लिएका छन् । हिमालयन गल्फ कोर्स पार ७० मा बुधबार सुरु भएको प्रतियोगिताको पहिलो दिन रविले १ अन्डर ६९ को कार्ड बनाउँदै सूर्य नेपाल गल्फ टुर २०१६–१७ अन्र्तगतको तेस्रो प्रतियोगितामा अग्रता बनाएका हुन् ।

नम्बर एक व्यवसायिक गल्फर शिवराम श्रेष्ठ, साविक विजेता धनबहादुर थापा र भुवन नगरकोटी इभन पार ७० को कार्ड बनाउँदै संयुक्त रुपमा दोस्रो स्थानमा छन् । भुबहादुर गुरुङ ३ ओभर ७३ को कार्ड बनाउँदै पाँचौं स्थानमा छन् भने कमल तामाङ, दीपक मगर र बलबहादुर राई ४ ओभर ७४ को कार्ड बनाउँदै छैटौं स्थानमा छन् । सञ्जय लामा ५ ओभर ७५ को प्रदर्शन गर्दै नवौं र मिथुन राई ६ ओभर ७६ को कार्ड बनाउँदै दसौं स्थानमा छन् ।

शीर्षस्थानका रविले फ्रन्ट नाइनमा ३७ को कार्ड बनाए भने ब्याक नाइनमा ३ अन्डर ३२ को प्रदर्शन गरे । दोस्रो होलमा डबल बोगी खेपेपनि रविले बाँकी आठ होलमा पार जोगाएका थिए । उनले ब्याक नाइनको १०औं,१४औं,१५औं,१६औं र १७ औं होलमा बर्डी गरे भने १३ औं होलमा डलब बुगी खेपे ।

शिवरामले पनि फ्रन्ट नाइमा ३७ को कार्ड बनाउँदा ब्याक नाइनमा २ अन्डर ३३ को प्रदर्शन गरे । फ्रन्ट नाइनको पहिलो, तेस्रो र छैटौं होलमा बोगी खेपेपनि शिवरामले नवौं होलमा बर्डी गरे । ब्याक नाइनमा १२ औं हलमा बोगीको सामना गरे पनि १५ औं,१७औं र १८ औं होलमा बर्डी बनाए ।

एमेच्योरतर्फ ४ ओभर ७४ को कार्ड बनाएका कमल तामाङ शीर्षस्थामा छन् । उनले फ्रन्ट नाइनमा ४ ओभर ३९ तथा ब्याक नाइनमा इभन पार ३५ को कार्ड बनाए । मिथुन राई ६ ओभर ७६ र युवराज भुजेल ८ ओभर ७८ को कार्ड बनाउँदै तेस्रो स्थानमा छन् ।

२८ व्यवसायिक र १३ एमेच्योर गरि ४१ गल्फरको सहभागिता रहेको प्रतियोगिता नेपाल प्रोफेसनल गल्फर एसोसिएसनले आयोजना गरेको हो भने सूर्य नेपाल प्रालीले प्रायोजन गरेको हो । २१ व्यवसायक र ६ एमेच्योर खेलाडीले अन्तिम १८ होलमा प्रतिस्पर्धा गर्नेछन् । ६ लाख रुपैयाँ कुल पुरस्कार रहेको वेस्टर्न ओपनको विजेताले १ लाख १० हजार , दोस्रो हुनेले ७० हजार, तेस्रो हुनेले ४५ हजार रुपैयाँ प्राप्त गर्नेछन् । शीर्ष २१ सम्म आउने खेलाडीले नगद पुरस्कार जित्ने छन् ।