बार्सिलोना (एजेन्सी)– बार्सिलोना कोपा डेल रे को फाइनल पुगेको छ । गए राती एट्लेटिको मड्रिडसँग दोस्रो लेगमा १–१ को बराबरी खेलेपनि पहिलो लेगको अग्रताले बार्सिलोना समग्रमा ३–२ नतिजासहित उपाधि नजिक पुगेको हो ।लुइस स्वारेज र लियोनल मेस्सीको गोलमा बार्सिलोनाले पहिलो लेगमा २–१ ले जितेको थियो । त्यति बेला एन्टोनियो ग्रिजमानले गोल फर्काएका थिए । तीन खेलाडीले रातो कार्ड पाएको खेलको अन्त्यमा बार्सिलोना ९ खेलाडी र एट्लेटिको १० खेलाडीमा सिमित भएको थियो ।

बुधबार खेलको ४३ औं मिनेटमा स्वारेजको गोलमा बार्सिलोनाले घरेलु मैदानमा अग्रता लिएका थिए । खेल सकिन ७ मिनेट बाँकी रहँदा एट्लेटिकोका केभिन गेमेरोले गोल फर्काउँदै टोलीको आशालाई जीवित राखेका थिए ।

परिवर्तित खेलाडीका रुपमा मैदान प्रवेश गरेका गेमेरो पेनाल्टीमा गोल गर्न चुकेपछि खेलको अन्त्यतिर गोल गर्न सफल भएका थिए । एट्लेटिको ग्रिजमानको गोललाई रेफ्रीले अफसाइड लिउका थिए । अर्को तिर बार्सिलोनाका मेस्सी को फ्रि किक पोस्टमा लागेर बाहिरिएको थियो ।

दुवै लेगमा गोल गरेका स्वारेजले फाइनल खेल्न भने नपाउने भएका छन् । खेलको अन्तिम तीन मिनेटमा दोहोरो पेहेलो कार्ड पाउँदै स्वारेजले मैदान छोड्नु परेको थियो । सेल्टा भिगो र अलाभेसबीचको विजेतासँग हुने फाइनलमा उनी खेल्न पाउने छैनन् ।

स्वारेजअघि दोस्रो पहेलो कार्डको सामना गर्दै बार्सिलोनाका सर्जी रोबर्टो मैदान बाहिरिदा बार्सिलोना १० खेलाडी मा सिमित भइसकेको थियो । एट्लेटिकोका विङर कारास्को पनि दोस्रो पटक पहेलो कार्डको सामना गर्दै मैदान बाहिरिदा टोली १० खेलाडीमा सिमित भएको थियो ।