काठमाडौं (हाम्रो खेलकुद) – काभा वुमन्स भलिबल नेसन्स लिगमा सहभागी हुन श्रीलंका र माल्दिभ्सका राष्ट्रिय महिला भलिबल टोली नेपाल आइपुगेका छन् ।

साउन १७ देखि २३ गतेसम्म दशरथ रंगशालामा चल्ने प्रतियोगिताका लागि दुई टोली मंगलबार दिउँसो काठमाडौं अवतरण गरेका हुन् । टोलीलाई नेपाल भलिबल संघका महासचिव रोशन श्रेष्ठसहित कार्यसमिति सदस्यको टोलीले त्रिभुवन अन्तर्राष्ट्रिय विमानस्थलमा स्वागत गरेको हो ।

५ राष्ट्र सम्मिलित प्रतियोगितामा नेपाल, इरान, भारत, श्रीलंका र माल्दिभ्स खेल्दैछन् । प्रतियोगिताको सम्पूर्ण खेल हाम्रो खेलकुदले प्रत्यक्ष प्रसारण गर्नेछ ।

प्रतियोगितामा विशेष सहयोगीको रुपमा राष्ट्रिय खेलकुद परिषद् हस्पिलेटी पार्टनरमा होटेल एभरेष्ट, मेडिकल पार्टनरको रुपमा नेपाल नेसनल हस्पिटल एवं मिडिया पार्टनरको रुपमा हाम्रो खेलकुद रहेको बताइएको छ ।

७ दिन सम्म चल्ने प्रतियोगिताको पहिलो दिन नेपाल र श्रीलंका तथा इरान र भारतबीच खेल हुनेछ‌ । नेपालले साउन १९ गते भारतसँग, साउन २० गते इरान र साउन २१ गते माल्दिभ्सको सामना गर्नेछ ।

राउन्ड रोविन‌ लिगपछि अंक तालिकाको‌ पहिलो र चौथो तथा दोस्रो र तेस्रो बीच साउन २२ गते सेमिफाइनल हुनेछ । फाइनल र तेस्रो स्थानको खेल साउन २३ गते हुनेछ ।