काठमाडौं (हाम्रो खेलकुद) – नेपालले दोस्रो दृष्टिबिहिन टि ट्वान्टी विश्व कप क्रिकेट प्रतियोगितामा आइतबार अर्को हार बेहोरेको छ । नेपाल आफ्नो छैटौ खेलमा श्रीलंकासँग एक सय ३१ रनको भारी अन्तरले पराजित भएको थियो । भारतमा जारी प्रतियोगितामा नेपालको यो पाँचौ हार हो ।

नेपाल यस अघि अस्ट्रेलिया, बंगलादेश, पाकिस्तान र वेस्ट इन्डिजसँग पराजित भइसकेको थियो । नेपालले एक मात्र जित दक्षिण अफ्रिकासँग प्राप्त गरेको थियो । पुने स्थित एमवाइसी क्रिकेट मैदानमा टस जितेर ब्याटिङ गरेको श्रीलंकाले निर्धारित २० ओभरमा मात्र २ विकेट गुमाउदै २ सय ७४ रन बनाएको थियो ।

जवाफमा नेपाली टोलीले ५ विकेट गुमाएर १ सय ४३ रन मात्रै जोड्न सक्यो । नेपालका लागि ओपनर सुनिल थापा मगरले ३० बलमा ४ चौकासहित ३८ बनाए । कप्तान किर्तन श्रेष्ठ दुवालले ४७ बलमा २ चौकासहित ३७ रन तथा पदम बहादुर बडैलाले १८ बलमा ३ चौकासहित २३ रन जोडे । त्यस बाहेक अब्दुल जाहिर फकिर १० रन, लोकबहादुर थापा ८ रन तथा सुनिल राना मगर १ रन बनाए । अर्का ओपनर बिक्रमबहादुर राना पहिलो बलमै आउट भए ।

श्रीलंकाका लागि ओपनर सुरङगा सम्पथले शतक पुरा गरे । ४८ बलमा उनले १९ चौका र १ छक्का साथ १ सय ११ रन बनाएका थिए । उनी रीटायर्ड हर्ट भएका थिए । अर्का ओपनर रुवान वासन्थाले ४१ बलमा ८ चौकाका साथ ७६ रनको जोडे । कभिदु थोमाले १२ बलमा अबिजित ३२ रन जोड्दा रुवान थिलकाले १८ बलमा ३३ रन प्रहार गरे । श्रीलंकाका दुई खेलाडी रन आउट भएका थिए भने नेपाली सुनिल थापा मगर र रमेश बहादुर बानिँयाले समान एक विकेट लिए ।

नेपाली टोलीका प्रशिक्षक रीजन प्रजुले नेपाली खेलाडीले श्रीलंकाविरुद्ध पनि फिल्डिङमा कमजोर प्रदर्शन गर्दा भारी अन्तरको हार बेहोर्नु परेको बताए । ‘श्रीलंका हामी भन्दा निक्कै उत्कृष्ट टोली हो । उनिहरुलाई पराजित गर्न मुस्किल थियो’, प्रशिक्षक प्रजुले भने, ‘तर, खेलाडीले फिल्डिङमा निक्कै कमजोर प्रदर्शन गरे । हातमा आएको बललाई रोक्न नसक्दा हामीले श्रीलंकालाई ५०–६० रन बढि दियौं । ’ सोमबार नेपालको खेल छैन ।