पोखरा (हाम्रो खेलकुद) – पोखरामा प्रथम सृजना आमन्त्रण महिला तथा पुरुष भलिबल प्रतियोगितामा नेपाली सेनाको त्रिभुवन आर्मी क्लबले विजयी सुरुवात गरेको छ । पश्चिमाञ्चल क्षेत्रिय खेलकुद विकास संघ, पश्चिमाञ्चल भलिबल संघ र कास्की जिल्ला भलिबल संघको संयुक्त आयोजनामा पोखरा रंगशालामा शनिबारको उद्घाटन खेलमा आर्मीले अर्को विभागिय टोली एपिएफ क्लबलाई ३—० ले हरायो ।

गत साता आफ्नै आयोजनामा राष्ट्रिय स्तरको भलिबलको उपाधि जितेमो आर्मीले एपिएफलाई २५—१९, २९–२७ र २५¬–२१ ले हराएको थियो । सृजना विकास केन्द्र कास्कीको प्रायोजनमा भएको प्रतियोगिताको सांसद रविन्द्र अधिकारीले रेफ्री नारायण बहादुर भण्डारीलाई भलिबल प्रदान गर्दै उद्घाटन गरेका थिए ।

सांसद अधिकारीले प्रतियोगिताको उद्घाटन गर्दै भलिबलको उर्वर भूमी पोखरालाई खेलकुद र खेल पर्यटनको राजधानी बनाउन आफु लागि पर्ने प्रतिवद्धता जनाए । उनले राजनीतिमा पनि प्रतिस्पर्धा हुने तर खेलमा जस्तै स्वच्छ प्रतिस्पर्धा नहुने भन्दै राजनीतिमा पनि स्वच्छ प्रतिस्पर्धा भएमा राष्ट्रको उन्नती तथा विकास हुने बताए । यस्तै अर्का सांसद सारदा शर्माले पोखराको रंगशालालाई अन्तराष्ट्रिय रगंशालाको रुपमा निर्माण गर्न आफु लागि पर्ने बताईन् ।
प्रतियोगितामा निर्णायकको तर्फबाट राष्ट्रिय रेफ्रि, पश्चिमाञ्चल भलिबल संघका सह कोषाध्याक्ष एवं प्रतियोगिता प्राविधिक कमिटिका संयोजक नारायण बहादुर भण्डारी र खेलाडीहरुका तर्फबाट एपिएफका अन्तराष्ट्रिय खेलाडी महेन्द्र श्रेष्ठले सपथ गरेका थिए । माघ २९ गते सम्म संचालन हुने प्रतियोगितामा महिला र पुरुष दुवै तर्फ नेपालका पाँच र भारतको एक गरि ६÷६ टिमको सहभागिता रहेको छ ।

प्रतियोगितामा दुवैतर्फको विजेताले १ लाख ५५ हजार ५सय ५५, दोस्रो हुनेले ७७ हजार ७ सय ७७ र तेस्रो हुने टोलीले ३३ हजार ३ सय ३३ रुपैयाँ प्राप्त गर्नेछन् । प्रतियोगिताका सर्वोत्कृष्ट खेलाडीले १० हजार रुपैयाँ पाउनेछन् । त्यस्तै अलग अलग विधा उत्कृष्ट लिफ्टर, ब्लकर, सेटर, स्पाईकर, डिफेन्डर र सर्भरलाई समान ५ हजार रुपैयाँ पाउनेछन् ।