पोखरा (हाम्रो खेलकुद)– आहा रारा गोल्डकप फुटबल प्रतियोगिताको सफल आयोजना पछि अब पोखरा भलिबल आयोजनाको तयारीमा जुटेको छ । सृजना विकास केन्द्र सिमलचौरको मुख्य प्रायोजनमा हुने सृजना आमन्त्रण अन्तराष्ट्रिय महिला तथा पुरुष भलिबल प्रतियोगिताको सबै तयारी पुरा भएको आयोजकले जनाएका छन् ।

कास्की जिल्ला तथा पश्चिमाञ्चल भलिबल संघको आयोजना, कास्की तथा पश्चिमाञ्चल क्षेत्रीय खेलकुद विकास समितिको संयोजनमा हुने प्रतियोगिताको आवश्यक तयारी पुरा भएको शुक्रबार पत्रकार सम्मेलनमार्फत जानकारी दिइयो । शनिबार सुरु हुने प्रतियोगिता माघ २९ गते सम्म चल्नेछ ।
८ दिने प्रतियोगितामा नेपाली सेना, शसस्त्र प्रहरी बल, नेपाल पुलिस क्लब, पश्चिमाञ्चल क्षेत्रीय भलिबल संघ र भारतको उत्तर प्रदेश भलिवल संघबाट महिला /पुरुष टिमको सहभागीता रहने पश्चिमाञ्चल क्षेत्रिय खेलकुद विकास समितिका अध्यक्ष खगराज पौडेलले जानकारी दिए । त्यसै गरि न्यु डायमण्ड एकेडेमीबाट महिला टोली र हेल्प नेपाल स्पोट्र्स क्लबबाट पुरुष टोलीको मात्र सहभागीता रहने उनले बताए ।
लिगकम नकआउटका आधारमा खेलाइने प्रतियोगिताका विजेताले महिला /पुरुष टोलीले उपाधिसहित एकलाख ५५ हजार ५ सय ५५ रुपैयाँ पाउने छन् । त्यस्तै दोस्रो हुने टोलीले ७७ हजार ७ सय ७७ रुपैया, तेस्रो हुनेले ३३ हजार ३ सय ३३ रुपैयाँ प्राप्त गर्नेछ ।
प्रतियोगिताको दुवैतर्फ उत्कृष्ट खेलाडीले १० हजार, वेष्ट स्पाइकर, वेष्ट ब्लकर, वेष्ट सटर, वेष्ट डिफेन्स र वेष्ट सर्भरले जनही ५ हजार रुपैया पाउने प्रतियोगिताका सचिवालय उपसमिति संयोजक डिबी नेपालीले बताए । शनिबार उद्घाटन खेल त्रिभुवन आर्मी क्लब र एपिएफ क्लबबीच हुनेछ ।