काठमाडौं (हाम्रो खेलकुद) – आयोजक एपिएफलाई हराउँदै न्यु डाइमन्ड एकेडेमीले चौथो सशस्त्र प्रहरी महानिरीक्षक राष्ट्रिय खुला महिला भलिबल प्रतियोगिताको उपाधि जितेको छ । सशस्त्र प्रहरीको मुख्यालय हलचोकमा भएको फाइनल रोमाञ्चक फाइनलमा एपिएफलाई ३–२ ले हराउँदै न्यु डाइमन्डले उपाधि जितेको हो ।

पहिलो सेट गुमाउनका वावजुद न्यु डाइमन्डले १५–२५, २५–२३,२५–१६,१६–२५ र १५–१२ ले नजिता आफ्नो पक्षमा पारेको थियो । एपिएफका प्रशिक्षक प्रकाश थपलियाले रिसिफ र डिफेन्स कमजोर भएका कारण खेल हार्नु परेको बताए । उनले ‘मुख्य कमजोरी रिसिफ र डिफेन्समा भयो । काउन्डर अट्याकमा पनि हामी सफल हुन सकेनौं ।’
न्यु डायमन्ड एकेडेमीका प्रशिक्षक कुमार राईले खेलाडीहरु उच्च मनोबलका साथ खेलेर उपाधि जितेको बताए । उनले ‘हाम्रा सबै खेलाडीले उत्कृष्ट खेल खेले । एपीएफको मुख्य हतियार स्पाइक र ब्लकलाई सफल हुन नदिंदा हामी सफल भएका हौं । ’
बिहीबार नै फाइनल अघि नेपाल पुलिसलाई हराउँदै पश्चिमाञ्चलले तेस्रो स्थान प्राप्त गर्यो । पश्चिमाञ्चलकी मञ्जु गुरुङ वमन अफ दी म्याच घोषित खेलमा पश्चिमाञ्चल २५–२१, २५–२१ र २५–१७ को सोझो सेटमा विजयी भयो ।
फाइनलमा समेत वुमन अफ दी म्याच बनेकी न्यु डाइमन्डकी प्रतिभा माली प्रतियोगिताको उत्कृष्ट खेलाडी घोषित भइर् । पुरस्कार स्वरुप उनले यामाहा कम्पनीको स्कुटर प्राप्त गरिन् । त्यस्तै विधागत रुपमा उत्कृष्ट स्पाइकर एपीएफकी सरस्वती चौधरी, उत्कृष्ट ब्लकरमा एपीएफकै नेविका चौधरी र उत्कृष्ट सेटर एपीएफकै बिनिता बुढाथोकी घोषित भइन् । न्यु डायमन्डका कृपा अधिकारी उत्कृष्ट सर्भर र सलिना श्रेष्ठ उत्कृष्ट डिफेन्स चयन भए । न्यु डायमन्डका राई उत्कृष्ट प्रशिक्षक घोषित भए । उत्कृष्टले समान ५ हजार रुपैयाँ प्राप्त गरे ।
न्यु डायमन्डले उपाधिसहित २ लाख ५० हजार तथा एपिएफले १ लाख २५ हजार रुपैयाँ प्राप्त गर्यो । तेस्रो स्थान पश्चिमाञ्चलले ५० हजार रुपैयाँ प्राप्त गर्यो ।